პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძემ აშშ-ის კონგრესში არსებული ეკონომიკის საკითხთა და ფინანსთა კომიტეტებისა და ქვეკომიტეტების წევრი კონგრესმენებისა და სენატორთა თანაშემწეებს უმასპინძლა.

მხარეებმა ერთმანეთს აშშ-ს კონგრესისა და საქართველოს პარლამენტის საქმიანობის ძირითადი მიმართულებები გააცნეს და საკუთარი გამოცდილება გაუზიარეს.

ამასთან, საუბარი შეეხო პარლამენტის საზედამხედველო ფუნქციის გაძლიერების მიმართულებით გატარებულ ღონისძიებებსა და მონიტორინგის პროცესებს, რომელსაც საფინანსო-საბიუჯეტო კომიტეტი სახელმწიფო ინსტიტუტების: ფინანსთა სამინისტროს, ეროვნული ბანკის, სახელმწიფო აუდიტის მიმართულებით ახორციელებს.

„შეხვედრაზე აქცენტი გაკეთდა საქართველო-აშშ-ს შორის სავაჭრო ეკონომიკური ურთიერთობების გაღრმავებაზეც, საქართველოს ხელსაყრელ საინვეტიციო კლიმატზე და ქვეყნის საქართველოს საბიუჯეტო და საფინანსო სექტორში არსებულ მდგომარეობაზე“, - ნათქვამია პარლამენტის საფინანსო-საბიუჯეტო კომიტეტის მიერ გავრცელებულ ინფორმაციაში.

შეგახსენებთ, რომ 29 სექტემბერიდან 5 ოქტომბრის ჩათვლით, საქართველოს პარლამენტი, ეკონომიკისა და მდგრადი განვითარების სამინისტროსთან ერთად, აშშ-ის კონგრესის თანამშრომელთა დელეგაციას მასპინძლობს.