ჩვენ ვახორციელებთ რეფორმებს სასამართლო სისტემის შემდგომი გაძლიერებისთვის, - ასე ეხმიანება იურიდიულ საკითხთა კომიტეტის თავმჯდომარე ნატო-ში აშშ-ის მუდმივმოქმედი წარმომადგენლის განცხადებას. როგორც ანრი ოხანაშვილი ჟურნალისტებთან აღნიშნავს, აშშ-ის საელჩო და ევროკავშირის წარმომადგენლობა აღნიშნულ რეფორმას მხარს უჭერს.
„მეოთხე ტალღის პროექტს იურიდიულ კომიტეტზე უკვე მხარი დავუჭირეთ და მხარდაჭერილია პლენარულ სხდომაზეც. მნიშვნელოვანია, რომ ამ საკანონმდებლო ინიციატივას მხარს უჭერს აშშ-ის საელჩო და ევროკავშირის წარმომადგენლობა. მათ გაავრცელეს ოფიციალური განცხადებაც, რომ ისინი მიესალმებიან მეოთხე ტალღის რეფორმას,"- აცხადებს ანრი ოხანაშვილი.
ცნობისათვის, აშშ-ის მუდმივმოქმედმა წარმომადგენელმა ნატოში განაცხადა, რომ საქართველოს სასამართლო სისტემაში გამოწვევები აქვს. მისი თქმით, აუცილებელია, საქართველოში რეფორმები წინ მიიწევდეს და იყოს დამოუკიდებელი სასამართლო სისტემა.