გია ხუხაშვილი - ანტიგმირი უნდა დამალო - ზარდიაშვილს მოუძებნიან ისეთ ადგილს, სადაც საზოგადოებას თვალში ნაკლებად გაეჩხირება

ზარდიაშვილის წასვლა-მოსვლა საერთოდ არ არის საინტერესო. პრობლემა ბევრად უფრო დიდია, ვიდრე ერთი კონკრეტული ზარდიაშვილი, - ასე ეხმაურება ექსპერტი გია ხუხაშვილი უმრავლესობის წევრის, ვანო ზარდიაშვილის მიერ დეპუტატის მანდატის დატოვებას.

ხუხაშვილის განცხადებით, „ხელისუფლების მხრიდან ეს არა მორალური გადაწყვეტილება, არამედ პოლიტიკური ტაქტიკა იყო - დამალო ვინმე დროებით იმიტომ, რომ პოლიტიკური სარგებელი მიიღო“.

“ზარდიაშვილი აქამდე რომ იყო პარლამენტში, ჩემთვის ესეც პრობლემატური იყო. კონკრეტულად ვანო ზარდიაშვილს კი არ ვერჩი, უბრალოდ ის ელემენტი, რასაც განასახიერებს ვანო ზარდიაშვილი ქართულ სინამდვილეში, არის ყოვლად მიუღებელი, რადგან ის და არა მხოლოდ ის, ბევრი სხვაც, განასახიერებდა იმ სისტემურ მანკიერებას, რომელიც დღევანდელმა ხელისუფლებამ ძალიან კარგად აითვისა და დაეყრდნო თავის ქმედებებში. ვანო ზარდიაშვილი ასოცირდებოდა მართლმსაჯულების სისტემის მანკიერებასთან და საერთოდ პოლიტიკური ქამელეონიზმის ფენომენთან, როდესაც პარტიიდან პარტიაში გადადიხარ, იმის მიხედვით, თუ ვინ არის ძალაუფლებაში“, - განაცხადა ხუხაშვილმა.

როგორც ექსპერტმა აღნიშნა, აქამდე თუ ვსაუბრობდით „შერჩევით სამართალზე“, ახლა საქმე გვაქვს „შერჩევით მორალთან“.

„ფაქტია, ეს არ იყო მორალური გადაწყვეტილება. ჩვენ ამის პარალელურად ვხედავთ ყოვლად წარმოუდგენელ უტიფრობას, როდესაც ხელისუფლების წარმომადგენლები ხმალამოღებულები იცავენ საკრებულოს მაჟორიტარ-დეპუტატს აშკარა ძალადობაზე, მაგრამ სამაგიეროდ რიგში დგებიან ხაჭაპურზე სალაპარაკოდ.

ხელისუფლების სარგებელი ისაა, რომ როდესაც ადამიანი ხდება ანტიგმირი, ის უნდა დამალო. მე არ მგონია, რომ ზარდიაშვილს ძალიან დაჩაგრავენ, უბრალოდ მოუძებნიან უფრო ისეთ ადგილს, სადაც საზოგადოებას ნაკლებად გაეჩხირება თვალში. დამერწმუნეთ, არანაკლებ პოზიციაზე ვიხილავთ მას, უბრალოდ ის საჯარო სივრციდან გაქრება თორემ პოზიცია არ შემცირდება“, - განაცხადა ხუხაშვილმა.

შეგახსენებთ, ვანო ზარდიაშვილი დეპუტატის მანდატს ტოვებს. ამის შესახებ ინფორმაციას თავად ავრცელებს.

მიხეილ კალანდია - თამამად შემიძლია ვთქვა, რომ 19 წლის ასაკში პოლიტიკური პატიმარი ვარ
ქართული პრესის მიმოხილვა 21.11.2019
დავით უსუფაშვილი - „გერმანული მოდელი“ სწორედ იმიტომ იქნა შერჩეული, რომ იგი ყველაზე ადეკვატური კონტრნაბიჯია, რათა პროცესები კონტროლიდან არ გამოვიდეს
რესქულში უძრავი ქონების შეფასების კურსი 25 ნოემბერს დაიწყება
კომპანია „ფრეგო“-ს მთავარი ინვესტორის ღია წერილი
BCard - "ემბისის" ბიზნეს ბარათი მცირე ფერმერებისა და მიკრო მეწარმეებისთვის
უნიმანია "უნიქარდისგან" - ექსკლუზიური შეთავაზება მინიმალური ქულებით (R)