რუსეთის ლიდერის პრესსპიკერი დიმიტრი პესკოვი ამერიკის შეერთებული შტატების პრეზიდენტის განცხადებას გამოეხმაურა, სადაც დონალდ ტრამპი ახალი იარაღის შექმნაზე საუბრობს. კრემლის ინფორმაციით, მოსკოვი ყურადღებით აკვირდება ვაშინგტონის ქმედებებს ამ მიმართულებით.
„მინდა გაგახსენოთ პრეზიდენტ პუტინის სიტყვები, რომ მოსკოვი არ შევა ამ „რბოლაში“ ამერიკასთან, რადგან წლების წინ რუსეთმა გადადგა უდიდესი ნაბიჯი წინ, ტექნოლოგიური უპირატესობის, უსაფრთხოებისა და პარიტეტის უზრუნველყოფისთვის“, -აცხადებს პესკოვი.
მან ასევე ისაუბრა ვაშინგტონის გეგმებზე ახალ სარაკეტო სისტემებთან დაკავშირებით და განაცხადა, რომ მსგავსი ქმედებები არღვევენ მცირე და საშუალო ზომის რაკეტების აღმოფხვრის შესახებ ხელშეკრულებას.
ცნობისთვის, ცოტა ხნის წინ, დონალდ ტრამპმა ახალი ტიპის იარაღის შექმნის შესახებ გეგმებზე განაცხადა.