რუსთავში, 35 წლის დავით მუმლაძის მკვლელობის საქმეზე დაკავებული, ერთ-ერთი პირის გიორგი გეთაშვილის მამა სასამართლოსთან შეუძლოდ გახდა და ადგილზე სასწრაფო გამოიძახეს.

როგორც გიორგი გეთაშვილის მამამ ჟურნალისტებთან საუბარში განაცხადა, მისი შვილი მკვლელი არ არის. მისივე თქმით, როცა მისი შვილი დააკავეს და პოლიციის შენობაში ჰყავდათ, გარედან ესმოდა ხმა თუ როგორ ემუქრებოდნენ სამართალდამცველები თუკი სასურველ ჩვენებას არ მისცემდა.

„ჩემ შვილს ამ საქმესთან არანაირი შემხებლობა არ აქვს და დანამდვილებით ვიცი, რომ ის მკვლელი არ არის. ვინც დამნაშავეა, ყველა ციხეში უნდა წავიდეს, მაგრამ როგორ შეიძლება ორი დღის განმავლობაში დაკავებულ ადამიანს არ განახებდნენ. ბორკილებით „ბატარიაზე“ მიაბან და გითხრან, რომ ის აქ არ არის. გამაგებინეთ რა ქვეყანაში ვცხოვრობთ“, - აცხადებს გიორგი გეთაშვილის მამა.

შეგახსენებთ, რომ 35 წლის დავით მუმლაძის ცხედარი მდინარე მტკვარმა, რუსთავში 5 ოქტომბერს გამორიყა. არსებული ინფორმაციით, მას სხეულზე 30-ზე მეტი ჭრილობა ჰქონდა მიყენებული. ოჯახი დავით მუმლაძეს 1-ელი ოქტომბრიდან ეძებდა.