მაიკ პომპეო - აშშ-ს თურქეთისთვის მწვანე შუქი არ აუნთია
ჩრდილოეთ სირიაში სამხედრო ოპერაციის ჩასატარებლად აშშ-ს თურქეთისთვის მწვანე შუქი არ აუნთია, - ამის შესახებ აშშ-ის სახელმწიფო მდივანმა მაიკ პომპეომ ამერიკულ PBS-თან საუბარში განაცხადა.
მისი თქმით, ინფორმაცია იმის შესახებ, რომ აშშ-მ თურქეთს თავდასხმის განხორციელების ნება დართო, „მხოლოდ სიცრუეა.“
აშშ-ის სახელმწიფო მდივანმა ასევე განაცხადა, რომ თურქეთის შეშფოთება უსაფრთხოებასთან დაკავშირებით ლეგიტიმურია და რომ მას ტერორისტებისგან საფრთხე ემუქრება.
შეგახსენებთ, რომ თურქეთის შეიარაღებულმა ძალებმა და „სირიის ეროვნულმა არმიამ“ სირიაში სამხედრო ოპერაცია - „მშვიდობის გაზაფხული“- დაიწყეს. თურქეთის პრეზიდენტის, რეჯეფ თაიფ ერდოღანის განცხადებით, მათი მიზანი „ტერორისტული დერეფნის განადგურება და რეგიონში მშვიდობის დამყარებაა.“
რამდენიმე დღის წინ აშშ-მ თურქეთ-სირიის საზღვრებიდან საკუთარი სამხედრო ძალები გაიყვანა. ამ ქმედების გამო აშშ-ის პრეზიდენტი დონალდ ტრამპი გააკრიტიკეს და ამერიკის მოკავშირე ქურთების წინააღმდეგ „მოღალატეობრივ ქმედებაში“ დაადანაშაულეს. აშშ-ის თავდაცვის დეპარტამენტმა კი განაცხადა, რომ მათ აღნიშნული ნაბიჯი თურქეთის მხრიდან მოსალოდნელი თავდასხმის გამო გადადგეს და საკუთარი ჯარისკაცების უსაფრთხოება უზრუნველყვეს.
