ჩემთვის, როგორც მაშინდელი მაღალჩინოსნისთვის, 7 ნოემბრის მოვლენები მიუღებელი იყო, - ასე უპასუხა პარლამენტში, იურიდიულ საკითხთა კომიტეტის სხდომაზე უზენაესი სასამართლოს მოსამართლეობის კანდიდატმა, საკონსტიტუციო სასამართლოს მოქმედმა თავმჯდომარემ, ზაზა თავაძემ საპარლამენტო უმრავლესობის წევრის, ნინო წილოსანის მიერ დასმულ კითხვას, თუ როგორ შეაფასებდა 2007 წლის 7 ნოემბერს.
როგორც ზაზა თავაძემ აღნიშნა, ამ ფაქტთან დაკავშირებით, მაშინ შესაბამისი რეაქცია ჰქონდა და „ის არ იყო ისეთი თანამდებობის პირი, რომელსაც ხმის ამოღება არ შეეძლო“.
„7 ნოემბერი შეფასებულია ჩემზე გაცილებით ჭკვიანი ადამიანების მიერ. იმ პირთა ჯგუფის მიერ, რომლებმაც არაერთი დასკვნა დადეს ამასთან დაკავშირებით. რა თქმა უნდა, ჩემთვის ეს ფაქტი, როგორც მაშინდელი მაღალჩინოსანისთვის, იყო მიუღებელი. მე ამაზე მქონდა კიდეც შესაბამისი რეაქცია. შესაბამისი კამათიც შეიძლება მქონდა. მე არ ვიყავი ის თანამდებობის პირი, რომელსაც არ შეეძლო ხმის ამოღება, თუ ის რაღაცას ფიქრობდა. შეიძლება მეტის გაკეთება შეიძლებოდა, რომ ვყოფილიყავი უფრო თანმიმდევრული, უფრო კრიტიკული, მაგრამ მაშინ გავაკეთე ის, რაც გავაკეთე“, - განაცხადა ზაზა თავაძემ.