უზენაესი სასამართლოს მოსამართლეობის კანდიდატი და საკონსტიტუციო სასამართლოს მოქმედი თავმჯდომარე ზაზა თავაძე საკონსტიტუციო სასამართლოს თავმჯდომარეობაზე უარს იტყვის იმ შემთხვევაში, თუ პარლამენტი უზენაესი სასამართლოს მოსამართლედ არ აირჩევს. ამის შესახებ იურიდიულ საკითხთა კომიტეტის სხდომაზე თავად მოსამართლეობის კანდიდატმა განაცხადა.
„რომ მოხდეს სასწაული და ვერ გახვედით უზენაესი სასამართლოს მოსამართლე, ისევ საკონსიტუციო სასამართლოს თავმჯდომარეობას მიუბრუნდებით“, - ამ კითხვით მიმართა სხდომაზე ფრაქცია „ევროპული საქართველოს“ წევრმა ხათუნა გოგორიშვილმა, რაზეც ზაზა თავაძემ ასე უპასუხა - „პირდაპირ გეტყვით, არა“.
შეგახსენებთ, რომ ზაზა თავაძე უზენაესი სასამართლოს რიგით მე-9 კანდიდატია, რომლის მოსმენაც პარლამენტში გაიმართა.