სირიის საგარეო საქმეთა მინისტრის მოადგილე, ფაისალ მიკდადი თურქეთის მიერ ქვეყნის ჩრდილო-აღმოსავლეთით დაწყებულ სამხედრო ოპერაციას „შეჭრად“ და „სუვერენული სახელმწიფოს ტერიტორიული მთლიანობის დარღვევად“ აფასებს. ინფორმაციას სირიის არაბთა სააგენტო „სანა“ ავრცელებს.
„სირიის არმია, რომელიც ტერორისტებს ებრძვის, ასევე ბრძოლას გამოუცხადებს ყველა დამპყრობელ ძალას, რომელიც არალეგიტიმურად იმყოფება სირიის ტერიტორიაზე“, - განაცხადა მიკდადმა. მისივე თქმით, ისტორია, თურქეთის ლიდერ რეჯეფ ტაიფ ერდოღანს ომის დამნაშავედ გამოაცხადებს, რომელმაც უმძიმესი დანაშაულები ჩაიდინა სირიელი ხალხის წინააღმდეგ.
„მატყუარას და რეალობის გამყალბებელს არ აქვს უფლება განაცხადოს, რომ ის სირიელ ხალხს იცავს და არც იმის უფლება აქვს სხვას გადააბრალოს ის დანაშაულები, რასაც თავად სჩადის ჩვენი ხალხის წინააღმდეგ. სირიის გმირი არმია თითოეულ სირიელს დაიცავს“, - აცხადებს მინისტრის მოადგილე.
შეგახსენებთ, თურქეთი სირიის ჩრდილო-აღმოსავლეთით სამხედრო ოპერაციას ახორციელებს. ოპერაციის მიზანი, თურქეთის საზღვრებთან „უსაფრთხოების ზონის“ მოწყობაა.