უზენაესი სასამართლოს მოსამართლეობის თითოეულ კანდიდატზე ინდივიდუალური კენჭისყრა იქნება, - ამის შესახებ ჟურნალისტებთან პარლამენტის თავმჯდომარემ არჩილ თალაკვაძემ განაცხადა. როგორც მან აღნიშნა, კენჭისყრისას გაითვალისწინებენ იმასაც, რომ საჭიროა უზენაესი სასამართლო მოსამართლეთა მინიმალური რაოდენობით მაინც დაკომპლექტდეს.
„როგორც დავპირდით საზოგადოებას და კანონმდებლობაც ამას ასე განსაზღვრავს, რომ თითოეულ კანდიდატზე იქნება ინდივუდუალური კენჭისყრა. საზოგადოებას ექნება საშუალება გადაამოწმოს თუ ვინ რომელ კანდიდატს დაუჭირა მხარი. როგორც ხედავთ, ჩვენი მხრიდან მწვავე კითხვებია. მხარს დავუჭერთ იმ კანდიდატებს, ვის მიმართაც საკმარისი ნდობა გვექნება. მეორე ფაქტორი, რითაც ვიხელმძღვანელებთ, მოსამართლეების რაოდენობა საკმაოდ მცირეა და მანდატი ეწურებათ იმ მოსამართლეებს, რომლებიც არიან უზენაეს სასამართლოში. ათასობით ღია საქმეა, რომელზეც მოქალაქეები ელოდებიან გადაწყვეტილებას, ამიტომ მნიშვნელოვანი იქნება მინიმალური რაოდენობით მაინც დაკომპლექტდეს უზენაესი სასამართლო, ჩვენ ამასაც გავითვალისწინებთ“, - განაცხადა არჩილ თალაკვაძემ.
შეგახსენებთ, რომ დღეს იურიდიულ საკითხთა კომიტეტზე მოსამართლეობის კანდიდატს ვლადიმერ კაკაბაძეს უსმენენ.