კახა კალაძე - დედაქალაქის მერია არის სახელმწიფო სახელმწიფოში - სხვაზე საუბარი გამიჭირდება, თუმცა ჩემს უწყებაში დახარჯულ თანხებზე პასუხისმგებელი ვარ

თბილისის მერის, კახა კალაძის განცხადებით, მისი უწყებიდან დახარჯულ თანხებზე პასუხისმგებლობას იღებს. ამის შესახებ ჟურნალისტებს კალაძემ „საერთაშორისო გამჭვირვალობა - საქართველოს“ კვლევის საპასუხოდ განუცხადა.

როგორც კალაძე აცხადებს, საზოგადოებასთან ურთიერთობის სამსახურისთვის ბიუჯეტიდან გამოყოფილი 931 281 ლარი „შეიძლება არც იყოს ბევრი“.

„დედაქალაქის მერია არის სახელმწიფო სახელმწიფოში. იმხელა უწყებაა. თავისი საქალაქო სამსახურებით, რაიონებით. ჩვენ ყოველდღიურ რეჟიმში მოსახლეობასთან გვიწევს კომუნიკაცია და ის თანხები, რაც იხარჯება ამ კუთხით, მიმართულია იმისკენ, რომ რაც შეიძლება მეტი ინფორმაცია მივაწოდოთ მოსახლეობას; გავაცნოთ არსებულ პროექტებთან დაკავშირებით რა მდგომარეობაა, რა პრობლემებია, სად გვიჭირს, სად გვაქვს დეფიციტური თემები, რა კეთდება და ა.შ. შესაბამისად, ეს კომუნიკაცია არის მნიშვნელოვანი. შეიძლება ეს თანხა არც იყოს ბევრი, ჩვენ თუ ავიღებთ მთლიანად ხელისუფლებას. სხვა უწყებებზე საუბარი გამიჭირდება, თუმცა ჩემ უწყებაზე, პასუხისმგებელი ვარ დახარჯულ თანხებზე“, - განაცხადა კალაძემ.

ცნობისთვის, „საერთაშორისო გამჭვირვალობა - საქართველოს“ ინფორმაციით, 2018 წელს 194 საჯარო უწყების პიარსამსახურში დასაქმებულთა ანაზღაურება 2 მილიონ ლარით გაიზარდა, რაც 10%-მდე ზრდას წარმოადგენს წინა წელთან შედარებით.

კვლევის მიხედვით, ყველაზე მეტი - 73 თანამშრომელი, მედიასთან/საზოგადოებასთან ურთიერთობის სამსახურში საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროშია დასაქმებული, მას თავდაცვის სამინისტრო მოსდევს - 51 თანამშრომელი, შემდეგ არის განათლების სამინისტრო - 49 თანამშრომელი, თბილისის მერია - 43 თანამშრომელი, შინაგან საქმეთა სამინისტრო - 41 თანამშრომელი, პარლამენტი - 36 თანამშრომელი, ფინანსთა სამინისტრო - 21 თანამშრომელი, შსს-ს აკადემია - 20 თანამშრომელი, ცესკო - 16 თანამშრომელი, რუსთავის მერია - 16 თანამშრომელი.

პიარის თანამშრომელთა ანაზღაურებაში ყველაზე მეტ თანხას საქართველოს თავდაცვის სამინისტრო ხარჯავს - 1 185 962 ლარი, მას ცოტათი ჩამორჩება საქართველოს პარლამენტი 1 114 251 ლარი და შინაგან საქმეთა სამინისტრო 1 053 271 ლარი. თბილისის მერიას კი ამ მიმართულებით 931 281 ლარი აქვს გამოყოფილი.

რამაზ საყვარელიძე - პროპორციული საარჩევნო სისტემა კიდევ უფრო მარცხიანს გახდის ოპოზიციის მდგომარეობას
ქართული პრესის მიმოხილვა 05.06.2020
თედო ჯაფარიძე - არ მგონია, რომ ამერიკის "დასუსტებით" რუსეთმა ან რომელიმე სხვა ქვეყანამ საკუთარი პოზიციები გაიმაგროს
მითები და რეალობა ჰესების შესახებ
ფინკა ბანკისა და სიმბიოტიკსის თანამშრომლობა მეწარმეების დაკრედიტების მიმართულებით გრძელდება
„ვისოლში“ საწვავზე წლის მიმდინარე პერიოდში რეკორდულად დაბალი ფასები დაფიქსირდა