ერთი ხელის აღებით ინდულგენციის გაცემა, ვისაც რა უნდა, ის აკეთოს და ყველას ყველაფერი ეპატიება, ასე სამართლებრივი სახელმწიფო ვერ აშენდება, - ასე შეაფასა დამოუკიდებელმა დეპუტატმა ეკა ბესელიამ „ევროპული საქართველოს“ ინიციატივა ამნისტიასთან დაკავშირებით. ბესელიას თქმით, ყველა დამნაშავემ პასუხი უნდა აგოს სამართლიანად და კანონის მიხედვით.
„ამ დისკუსიას რომ ვადევნებ თვალს, მართალი გითხრათ, ამ მოცემულობაში ცოტა უცნაურად ჩანს, უფრო ააშკარავებს პოლიტიკურ პარტიების შემდგომ მიზანს. წინასწარი ინდულგენციის მიცემა, რაც არ უნდა ჩაიდინო, ყველაფერი გეპატიებათ - ეს გზავნილი არ მიმაჩნია, რომ სწორია. სწორი და სამართლიანია თქვა, რომ ყველას სამართლიანად და კანონის მიხედვით მოუწევს პასუხისმგებლობის აღება, ასევე სწორად მიმაჩნია, რომ მოდით ჯერ შევქმნათ მყარი და ნეიტრალური მთავარი სამართლებრივი ინსტიტუტები, როგორიც არის სასამართლო და პროკურატურა, რომელმაც უნდა გამორიცხოს პოლიტიკური დევნა. პოლიტიკური დევნის გამორიცხვის პირობებში ყველამ სამართლიანად აგოს პასუხი იმაზე, რაც მას ჩადენილი აქვს. ასე ერთი ხელის აღებით ინდულგენციის გაცემა, ვისაც რა უნდა ის აკეთოს, ყველას ყველაფერი ეპატიება, ასე სამართლებრივი სახელმწიფო ვერ აშენდება“, - განაცხადა ეკა ბესელიამ.