პეკინზე 3 წლის ბავშვის დაჭრაში ბრალდებულ თამარ საძაგლიშვილს სასამართლო ფსიქიატრული ექსპერტიზა უტარდება. აღნიშნულის შესახებ "ინტერპრესნიუსს" საძაგლიშვილის ადვოკატმა, ალექსი გაბუნიამ განუცხადა.
როგორც გაბუნია აღნიშნავს, თამარ საძაგლიშვილი სამხარაულის სახელობის სასამართლო ექსპერტიზის ეროვნულ ბიუროში დღეს გადაიყვანეს.
„ჩემი დაცვის ქვეშ მყოფს სასამართლო ფსიქიატრიული ექსპერტიზა უტარდება. დაახლოებით, 2-3 კვირაში, მის შერაცხადობასთან დაკავშირებით, ექსპერტიზის დასკვნა იქნება. ამასთან, ჩვენ მივიღეთ ბავშვის ჯანმრთელობის მდგომარეობასთან დაკავშირებით ექსპერტიზის დასკვნა, რომლის მიხედვითაც, არასრულწლოვანს მსუბუქი ხარისხის დაზიანება აქვს მიყენებული. საძაგლიშვილს მძიმე ბრალს ედავებიან - სხეულის განზრახ მძიმე დაზიანებას. აღნიშნული დასკვნა კი, არსებითად ცვლის სასჯელის სახეს. ჩასატარებელია კიდევ ერთი ექსპერტიზა, ეს დაზიანება ტოვებს თუ არა წარუშლელ კვალს", - განაცხადა გაბუნიამ.
დღევანდელ სასამართლო სხდომაზე ბრალდების მხარე საგამოძიებო ვადის გაგრძელების შუამდგომლობას დააყენებს.
თამარ საძაგლიშვილს ბრალი დაჭრილი არასრულწლოვნის სხეულის განზრახ მძიმე დაზიანებისა და მისი დის სხეულის განზრახ მძიმე დაზიანების მცდელობისთვის წაუყენეს.