რუსეთსა და საქართველოს შორის პირდაპირი ავიამიმოსვლის გაუქმებამ შვეიცარიის, როგორც რუსეთის საქართველოში ინტერესების წარმომადგენლის მუშაობა გაართულა. „რია ნოვოსტის“ ინფორმაციით, ამის შესახებ შვეიცარიის ფედერალური ასამბლეის კანტონის საბჭოს თავმჯდომარემ ჟან რენ ფურნიემ რუსეთის დუმის სპიკერთან ვიაჩესლავ ვოლოდინთან შეხვედრისას განაცხადა.

„რუსეთსა და საქართველოს შორის პირდაპირი ავიამიმოსვლის გაუქმებამ ნეგატიული გავლენა მოახდინა და საშუალება მისცა გაძლიერებულიყო ის უმცირესობა, რომელსაც რუსეთთან კარგი დამოკიდებულება არ აქვს“, - განაცხადა ფურნიემ.

მისი თქმით, პირდაპირი რეისების გაუქმებამ დააზარალა ასევე ისინი, ვინც ორი ქვეყნის პრაგმატული ურთიერთობების მოთხოვნით გამოდის.

„ამან გამოიწვია ის, რომ დაისაჯნენ ისინი, ვინც განწყობილია კარგი ურთიერთობებისადმი. ეს გადაწყვეტილება აზიანებს მთელ ქართულ ეკონომიკას“ ,- განაცხადა ფურნიემ.

მისივე თქმით, პირდაპირი რეისების გაუქმება იქცა იმ ნაბიჯად, რომელმაც გაართულა შვეიცარიის მუშაობა, რომელიც რუსეთის ინტერესებს წარმოადგენს საქართველოში.