საგარეო საქმეთა მინისტრთან რასაკვირველია, უმრავლესობის დეპუტატებსაც ექნებათ შეკითხვები, ეს ეხება დავით გარეჯის საკითხს და ლავროვთან შეხვედრას და მოლაპარაკებებს,- ამის შესახებ საპარლამენტო უმრავლესობის ლიდერმა გია ვოლსკიმ ჟურნალისტებთან განაცხადა.
მისივე თქმით, შეკითხვები ასევე შეეხება საოკუპაციო ხაზთან არსებულ სიტუაციას და ქართულ- რუსულ ურთიერთობებს. მისივე თქმით, როცა ვითარება დაძაბულია, მოლაპარაკებას ალტერნატივა არ აქვს.
"მე ვფიქრობ, რომ ოპოზიციის პოზიცია ამ შემთხვევაში დამაზიანებელია, რადგან როცა საქართველოს გარკვეული პრობლემები ემუქრება და ვითარების დამძიმების რეალური პერსპექტივაა და საფუძველი ჩანს, რასაკვირველია, მოლაპარაკებებს ალტერნატივა არ აქვს. მითუმეტეს, თუ გავითვალისწინებთ, რომ საქართველი არ არის ეული, ის არის ნაწილი პარტნიორი ქვეყნების გუნდის, რომელიც ინტენსიურად არის ჩართული მსოფლიოში მიმდინარე პროცესებში. ასე რომ ეს არ არის მარტო ჩვენი პოზიცია, რომ უნდა ვილაპარაკოთ და ესეც გასათვალისწინებელი აქვს ოპოზიციას,"- განაცხადა გია ვოლსკიმ.
საგარეო უწყების ხელმძღვანელს დღეს „მინისტრის საათის“ ფორმატში პლენარულ სხდომაზე მოუსმენენ.