ჩვენ არ ველოდით იმას, რომ ყველა საკითხთან დაკავშირებით სიამტკბილობა გვექნებოდა პრეზიდენტთან ან ერთნაირ პოზიციებს გამოვხატავდით, თუნდაც ამ საკითხთან დაკავშირებით, რასაც შეწყალება ჰქვია,-ამის შესახებ საპარლამენტო უმრავლესობის ლიდერმა გიორგი ვოლსკიმ ჟურნალისტებს განუცხადა.
ჟურნალისტებმა გიორგი ვოლსკის ჰკითხეს, არსებობს თუ არა დაპირისპირება პრეზიდენტსა და ხელისუფლებას შორის, რადგან იუსტიციის მინისტრი სალომე ზურაბიშვილს გამოკითხვაზე მისვლისკენ მოუწოდებს. საპასუხოდ ვოლსკიმ განაცხადა, რომ “ყველაფერს შეიძლება დაპირისპირება დაარქვან”.
“არსებობს დამოუკიდებელი პოზიციები, რა ნიშნითაც შეირჩა პრეზიდენტობის კანდიდატი. ჩვენ არ ველოდით იმას, რომ ყველა საკითხთან დაკავშირებით სიამტკბილობა გვექნებოდა ან ერთნაირ პოზიციებს გამოვხატავდით, თუნდაც ამ საკითხთან დაკავშირებით, რასაც შეწყალება ჰქვია. არა მარტო თეა წულუკიანმა, რამდენადაც მახსოვს მამუკა მდინარაძემაც გააკეთა განცხადება. თუ საჭიროა, რა თქმა უნდა, უნდა მივიდეს, როგორც პრემიერ-მინისტრი მივიდა და ნებისმიერი ჩვენთაგანი, კითხვები თუ იქნება, გასცეს პასუხები”,-განაცხადა ვოლკსიმ.
რაც შეეხება შეწყალებაზე გამოცხადებულ მორატორიუმს, ვოლკსი ამბობს, რომ “მორატორიუმი რაც შეიძლება მალე უნდა დამთავრდეს”.