როცა აღმასრულებელი ხელისუფლების და პროკურატურის ინსტრუმენტები აშკარა შთაბეჭდილებას ტოვებს, რომ გამოძიებისთვის ნება აკლია, მაშინ პარლამენტის ვალია, რომ იმოქმედოს, - ამის შესახებ “ევროპული საქართველოს” ერთ-ერთმა ლიდერმა გიგა ბოკერიამ ჟურნალისტებს განუცხადა, რითაც მსჯავრდებულების შეწყალების თაობაზე საქართველოს პრეზიდენტის საგამოძიებო ორგანოში გამოკითხვის თაობაზე დასმულ კითხვას უპასუხა.
ბოკერიას თქმით, თუნდაც მისთვის ისეთი მიუღებელი პოლიტიკური ოპონენტის შემთხვევაში, როგორიც სალომე ზურაბიშვილია, სურს, რომ “სამართლებრივ ჩარჩოებში” დარჩეს და სწორედ ამიტომ, სავარაუდოდ “ევროპული საქართველო” აღნიშნულთან დაკავშირებით საპარლამენტო კომისიის შექმნის საკითხს დააყენებს.
“სალომე ზურაბიშვილი, რომელმაც ჩაიდინა სრულიად უპატივცემულო და უტიფარი საქციელი საზოგადოებასთან მიმართებაში, რადგან არც კი აგვიხსნა, რატომ მიიღო ასეთი სკანდალური გადაწყვეტილება აქაც გვინდა, რომ სამართლებრივ ჩარჩოში დავრჩეთ. ეს არის დემოკრატიული ოპოზიციის ამოცანა. დღეს რა განცხადებებიც გააკეთა პროკურატურამ, გვაძლევს ეს საფუძველს ვიფიქროთ, რომ პოლიტიკური ნება სერიოზული გამოძიების არ არსებობს. ამიტომ სულ მალე ჩვენ სავარაუდოდ, დავსვამთ საკითხს, რომ საპარლამენტო კომისია შეიქმნას. როცა აღმასრულებელი ხელისუფლების და პროკურატურის ინსტრუმენტები აშკარად შთაბეჭდილებს ტოვებს, რომ გამოძიებისთვის ნება აკლია, მაშინ პარლამენტის ვალია, რომ იმოქმედოს”, - განაცხადა გიგა ბოკერიამ.