ნატახტართან, ცენტრალურ მაგისტრალზე, მოძრაობა „შეცვალეს“ საპროტესტო აქცია დასრულდა.

როგორც აქციის ორგანიზატორები აცხადებენ, მათ უნდოდათ აქციის მოწყობა იმ შეტყობინებების გაჟღერების მიზნით, რომ „რუსეთი ოკუპანტია, საქართველოს მთავრობა კოლაბორაციონისტია და საქართველო არ დაუშვებს, რომ რუსეთის გუბერნია გახდეს“.

აქციის მონაწილეებს ე.წ. ზებრაზე გადასვლის საშუალება არ მიეცათ.

პოლიციის წარმომადგენელთა განცხადებით, პროტესტის უფლება ყველას აქვს, თუმცა მაგისტრალზე გაჩერება და მოძრაობის შეფერხება არ შეიძლება.

როგორც ორგანიზატორებმა განაცხადეს, ხვალ, სოფელ შაქშაქეთთან ანტისაოკუპაციო საპროტესტო აქცია გაიმართება.

„მოძრაობა „შეცვალეს“ სახელით მინდა მოგიწოდოთ და გთხოვოთ, ხვალ, 16:00 საათიდან შაქშაქეთთან შევიკრიბოთ. გელოდებით ყველას ანტისაოკუპაციო აქციაზე. ყველა ერთად რუსეთის წინააღმდეგ, ყველა ერთად კოლაბორაციონისტი მთავრობის წინააღმდეგ“, - განაცხადეს აქციის ორგანიზატორებმა.