გურამიშვილის გამზირზე მდებარე საცხოვრებელ კორპუსში, სადაც აფეთქება მოხდა, მოსახლეობის ნაწილს ეტაპობრივად უშვებენ საკუთარი ნივთების ასაღებად. როგორც ჟურნალისტებთან ერთ - ერთი ადგილობრივი ყვება, მისი ბინა, რომელიც მესამე სართულზე მდებარეობს, ავარიულ მდგომარეობაშია.
" წარმოიდგინეთ, ბინა რომ გაყოთ ორ ნაწილად. ბოლო ნაწილში შევედით მხოლოდ და იქ ვიღებდით ჩვენს ნივთებს, რაც ხელს მოგვხვდებოდა, მეორე ნაწილში არ გადაგვიშვეს, სახიფათო იყო. 5 წუთი მოგვცეს მხოლოდ ნივთების ასაღებად და მოგვცეს ასევე პირობა, რომ კიდევ შეგვიშვებენ და წამოვიღებთ იმას, რაც გადარჩა. ჩემთან ფანჯრები არ იყო დახურული და არ იყო შესაბამისად ისეთი წნევა. ჭერია ჩამოწეული, ფასადი მორყეული და კედლები დაბზარული. აბაზანის ჭერია მთლიანად ჩამონგრეული. მე ვერ გეტყვით, რა ზარალია, ეს უნდა დაითვალონ სპეციალისტებმა", - აცხადებს ნანა ნუცუბიძე.