ოპოზიციას აღარ აქვს ობიექტური შენიშვნის საფუძველი და ახლა უზენაესი სასამართლოს მოსამართლეობის კანდიდატების დისკრედიტაციას ცდილობს, - ამის შესახებ იურიდიულ საკითხთა კომიტეტის თავმჯდომარე ანრი ოხანაშვილმა ჟურნალისტებს განუცხადა, რითაც გამოეხმაურა უზენაესი სასამართლოს მოსამართლეობის კანდიდატების პარლამენტში მოსმენის პროცესს. მისი თქმით, მოსამართლეობის კანდიდატების დისკრედიტაცია მთლიან პროცესს აზიანებს და ეს ჯანსაღი არ არის.
„ოპოზიციას აღარ აქვს პროცესთან დაკავშირებით საუბრის საფუძველი. ისინი ობიექტურად შენიშვნას ვერ დააფიქსირებენ ამაზე და ახლა ცდილობენ თითოეული კანდიდატის დისკრედიტაცია მოახდინონ. რა თქმა უნდა, ოპოზიციისა და მმართველი გუნდის წარმომადგენლებს უფლება აქვთ, ვინმე მოსწონდეთ ან არა, გააკრიტიკონ ან არ გააკრიტიკონ, თუმცა კანდიდატების დისკრედიტაცია აზიანებს მთლიანად პროცესს და ეს არ არის ჯანსაღი. გვესმის, რომ ჩვენ აქ კანდიდატები კომფორტის შესაქმნელად არ მოგვყავს. ისინი აქ მოდიან იმისთვის, რომ საკუთარი უნარები წარმოაჩინონ და ლოგიკურია, რომ იქნება კრიტიკული შეკითხვები, თუმცა ჩვენი თვითმიზანი არ უნდა იყოს თითოეული კანდიდატის დისკრედიტაცია იმისთვის, რომ ამით მთლიანობაში პროცესის ან მოსამართლეების დისკრედიტაცია მოვახდინოთ. ეს არ იქნება ჯანსაღი", - განაცხადა ოხანაშვილმა.