ქართული პრესის მიმოხილვა 23.10.2019

"სპეცრაზმელმა, რომელმაც თემირლანს ესროლა, თავი მოიკლა“ - მალხაზ მაჩალიკაშვილი

"რა მოხდა მერე... შეიძლება იქაც ოპონირებდნენ“, - რევაზ არველაძე ბოკერია-ზარდიაშვილის ერთობლივ გამოსვლაზე

***

"სპეცრაზმელმა, რომელმაც თემირლანს ესროლა, თავი მოიკლა“ - მალხაზ მაჩალიკაშვილი

“პანკისში დაღუპული თემირლან მაჩალიკაშვილის მამა, მალხაზ მაჩალიკაშვილი აცხადებს, რომ ამ სპეცოპერაციაში მონაწილე პირთა უმრავლესობამ საქართველო დატოვა, ხოლო იმ სპეცრაზმელმა კი, რომელმაც უშუალოდ ესროლა თემირლან მაჩალიკაშვილს, სიცოცხლე თვითმკვლელობით დაასრულა. მალხაზ მაჩალიკაშვილის თქმით, ეს ინფორმაცია სანდო წყაროებისგან მიიღო”, - წერს გაზეთი "რეზონანსი“ სტატიაში სათაურით, „სპეცრაზმელმა, რომელმაც თემირლანს ესროლა, თავი მოიკლა“ - მალხაზ მაჩალიკაშვილი

„გენერალურ პროკურატურაში კი ამ საქმეზე სახელმწიფო უსაფრთხოების სამსახურის ყოფილი უფროსი ვახტანგ გომელაური, მისი ყოფილი მოადგილე სოსო გოგაშვილი და სუს-ის ანტიტერორისტული ცენტრის ხელმძღვანელი ირაკლი ჩიმაკაძე დაიკითხნენ. ყველა მათგანის დაკითხვა, როგორც „რეზონანსს“ სანდო წყარო უდასტურებს, ერთი დღის წინ მოხდა. თავდაპირველად აღნიშნული ინფორმაცია „ინტერპრესნიუსმა“ გაავრცელა. რატომ არ დაიკითხნენ საქმის ირგვლივ აღნიშნული პირები ამ ხნის განმავლობაში და რა ახალი გარემოებები შეიძლება გამოძიების დროს მათი დაკითხვის შემდეგ გამოიკვეთოს? აღიარებს თუ არა სახელმწიფო დანაშაულს მაჩალიკაშვილის მკვლელობის ფაქტზე?“, - აღნიშნავს გამოცემა.

"ერთი წელი და ათი თვე გავიდა მას შემდეგ, რაც პანკისში სპეცოპერაციის დროს 19 წლის თემირლან მაჩალიკაშვილი დაიჭრა და შემდეგ გარდაიცვალა. თემირლან მაჩალიკაშვილის მამა მალხაზ მაჩალიკაშვილი „რეზონანსთან“ მაღალჩინოსნების დაკითხვას სტრასბურგის სასამართლოს უკავშირებს. მაჩალიკაშვილი გვიდასტურებს, რომ მათი დაკითხვა, სავარაუდოდ, ორშაბათს მოხდა და მან ამის შესახებ წინასწარ უკვე ერთი კვირის წინ იცოდა. მალხაზ მაჩალიკაშვილი აცხადებს, რომ საქართველოს ხელისუფლებას ევროპულმა სასამართლომ რამდენიმე კვირა მისცა იმისთვის, რომ ამ საქმის ირგვლივ კონკერტული მტკიცებულებები შეგროვდეს და გამოძიება წარიმართოს. მისივე განცხადებით, ეს არის ტყუილების ახალი სერია, რომელსაც ახლა საქართველოს პროკურატურა მიმართავს. გენერალურ პროკურატურაში ადასტურებენ, რომ მოქმედი მაღალჩინოსნების დაკითხვა მოხდა, თუმცა, გამოძიების ინტერესებიდან გამომდინარე, დაკონკრეტებისგან თავს იკავებენ. მათი თქმით, საქმის ირგვლივ ჭეშმარიტების დასადგენად ყველა საჭირო პირის დაკითხვა მოხდება, ვინც გამოძიებისთვის საინტერესო იქნება”, - განაგრძობს გამოცემა.

"სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი გენერალურ პროკურატურაში მის დაკითხვასთან დაკავშირებით პირველ კომენტარს აკეთებს. „ინტერპრესნიუსთან“ საუბარში გოგაშვილი იმედს გამოთქვამს, რომ პანკისის ხეობაში ჩატარებულ სპეცოპერაციასთან დაკავშირებით გამოძიება მალე დასრულდება და ყველაფერს ნათელი მოეფინება. „გიდასტურებთ, რომ დავიკითხე პანკისის სპეცოპერაციასთან დაკავშირებით დაახლოებით ორი თვის წინ. იმედი მინდა გამოვთქვა, რომ მალე დასრულდება აღნიშნული გამოძიება“, - განაცხადა გოგაშვილმა. მალხაზ მაჩალიკაშვილი „რეზონანსთან“ ამბობს, რომ მაღალჩინოსნების დაკითხვა კიდევ ერთი სპექტაკლია, რომელსაც ახლა პროკურატურა სტრასბურგის სასამართლოს მოსაჩვენებლად თამაშობს. ევროპულმა სასამართლომ მაჩალიკაშვილის საქმე წარმოებაში მიიღო და მისი თქმით, სწორედ ეს არის მიზეზი, რის გამოც საქმის ირგვლივ საქართველოს ხელისუფლება გააქტიურდა”, - დასძენს გამოცემა.

„მისივე ინფორმაციით, მაღალჩინოსნებთან მიმდინარეობდა მოლაპარაკება, თუ როგორ და რა ფორმით უნდა მომხდარიყო მათი დაკითხვა. „ეს არის ტყუილების კიდევ ერთი სერია. რეალურად არაფერი ამ საქმის ირგვლივ არ შეიცვლება. ახლა ამათი გააქტიურება სტრასბურგის სასამართლოს გამო დაიწყო. იქიდან მიიღეს უკვე დავალება, რომ რამდენიმე კვირის განმავლობაში საქმის ირგვლივ გარკვეული სიახლე უნდა იყოს და შეშინებულებმა ფაცხა-ფუცხი დაიწყეს. „ჩემი სანდო წყაროები მეუბნებიან, რომ სპეცრაზმის უფროსი, რომელიც ამ ოპერაციას ხელმძღვანელობდა და სხვა კიდევ მკვლელობის შემსწრე პირები საქართველოდან წავიდნენ. მათ ქვეყანა ფარულად დაატოვებინეს. ერთმა, რომელმაც თემირლანს ესროლა, არ ვიცი რამდენად მართალია, მაგრამ მითხრეს, რომ თავი მოიკლა. „თემირლანის ოთახში სამი სპეცრაზმელი შევიდა. სწორედ ამ სამმა იცოდა რეალურად რა და როგორ მოხდა. ცოცხალი თავით არ ამბობენ, რომ თემირლანს ყურსასმენები ეკეთა და ისე მოკლეს. მერე ხელყუმბარა უკვე მაღალჩინოსნებმა მიიტანეს. რა ფარსიც არ უნდა დადგან, ამ საქმეს მაინც ბოლომდე მივიყვან“, - აცხადებს მალხაზ მაჩალიკაშვილი „რეზონანსთან“. მისივე თქმით, ყველა ღონეს გამოიყენებს, წლებიც რომ დასჭირდეს, რათა ამ საქმეზე სახელმწიფომ დანაშაული აღიაროს. აღიაროს, რომ თემირლან მაჩალიკაშვილი ტერორისტი არ ყოფილა და უდანაშაულო ადამიანი მოკლეს. მაჩალიკაშვილი ამბობს, რომ წელიწადი და ათი თვეა რაც ხელისუფლებას იმედი ჰქონდა თემირლან მაჩალიკაშვილის დანაშაულის დამტკიცების, თუმცა ეს ვერ შეძლო, რადგანაც ის დამნაშავე არ არის. ეს კი რაც დრო გადის, უფრო მტკიცდება. გამოძიების ინფორმაციით კი, თემირლან მაჩალიკაშვილი, ამ საქმეზე დაკავებულ რუსლან ალდამოვთან, ბადურ ჩოფანაშვილთან და რამაზ მარგოშვილთან ერთად, უშუალოდ ხელმძღვანელობდა ახმედ ჩატაევისა და მისი დაჯგუფების წევრების საქართველოში შემოყვანას, მათ დაბინავებას, საცხოვრებელი ბინით, საკვებით, მობილური ტელეფონებით და სხვა საყოფაცხოვრებო პირობებით უზრუნველყოფას. თემირლან მაჩალიკაშვილს 331-ე პრიმა მუხლით გათვალისწინებული ბრალდება ჰქონდა წაყენებული, რაც ტერორიზმის დაფინანსებას, ტერორისტული საქმიანობის სხვაგვარ მატერიალურ მხარდაჭერას, ან რესურსებით უზრუნველყოფას გულისხმობს, რამაც მძიმე შედეგი გამოიწვია. ეს მუხლი სასჯელის ზომად 17 დან 20 წლამდე ვადით, ან უვადო თავისუფლების აღკვეთას ითვალისწინებს”, - წერს სტატიის ავტორი.

"რა მოხდა მერე... შეიძლება იქაც ოპონირებდნენ“, - რევაზ არველაძე ბოკერია-ზარდიაშვილის ერთობლივ გამოსვლაზე

ჩემთვის, მაგალითად, იქ არაფერი მოულოდნელი არ იყო, - ასე აფასებს ქართული ოცნებისა და საპარლამენტო უმრავლესობის წევრი რევაზ არველაძე არასამთავრობო ორგანიზაცია ინიციატორის საჯარო ლექციაზე ევროპული საქართველოს ლიდერის გიგა ბოკერიასა და ქართული ოცნების ყოფილი წევრის ვანო ზარდიაშვილის სიტყვით ერთად გამოსვლას”, - წერს გაზეთი "რეზონანსი"სტატიაში სათაურით, "რა მოხდა მერე... შეიძლება იქაც ოპონირებდნენ“, - რევაზ არველაძე ბოკერია-ზარდიაშვილის ერთობლივ გამოსვლაზე

“ჩემთვის მაგალითად იქ არაფერი მოულოდნელი არ იყო. რატომ უნდა იყოს მოულოდნელი?! შეიძლება იქაც ოპონირებდნენ, სადაც იყვნენ. რა მოხდა მერე, ერთად რომ დაჯდნენ, „სიმართლე რომ გითხრათ, ზარდიაშვილთან არანაირი კავშირი არასდროს არ მქონია, ერთმანეთს პარლამენტში ვხვდებოდით და გამარჯობას ვეუბნებოდით, მეტი არაფერი“, -აცხადებს არველაძე”, - დასძენს გამოცემა.

"შეგახსენებთ, რომ ზარდიაშვილისა და ბოკერიას ერთობლივი საჯარო ლექციის ვიდეო სოციალურ ქსელში გამოქვეყნდა, რასაც საზოგადოების მხრიდან არაერთგვაროვანი შეფასებები მოჰყვა”, - წერს სტატიის ავტორი.

ზაზა ფირალიშვილი - უბრალოდ, ივანიშვილს  ვერ წარმოუდგენია, რომ თავადაც ძველი ხელისუფლების მსგავსი შეცდომები მოსდის
ქართული პრესის მიმოხილვა 16.11.2019
ხათუნა ლაგაზიძე -  პარლამენტში მიმდინარე პროცესები იმის ტესტიც არის, თუ რად უღირს თანამედროვე დასავლურ პოლიტიკურ ელიტას საქართველო
ოფისი განახლებულ ჭავჭავაძეზე, ბიზნეს-ცენტრ პიქსელში
საქართველოში მინა-პაკეტის დამზადების ხარისხის კონტროლი ჩატარდა
გამოიძახე ექიმი სახლში - REDMED ინოვაცია ქართულ სამედიცინო სფეროში
#იმოგზაურევისოლთანერთად - საქართველოს დაცულ ტერიტორიებზე მედია-ტური გაიმართა