ეს კადრები არ მინახავს, თუმცა, მითხრეს, - ამ განცხადებით პრემიერ-მინისტრი გიორგი გახარია სავარაუდოდ, ცხინვალის იზოლატორში ცემის ამსახველ ვიდეოს გამოეხმაურა, რომელიც გუშინ გავრცელდა.

გიორგი გახარია აღნიშნავს, რომ მსგავსი შემთხვევების პრევენციისთვის ერთადერთი გზა არსებობს და ეს საერთაშორისო პარტნიორებთან ერთად მოქმედებაა.

„აქ ჩვენ გვაქვს ერთადერთი სწორი და ლეგიტიმური გზა ჩვენს საერთაშორისო პარტნიორებთან ერთად, ყველა იმ მხარესთან ერთად, ვინც არის ჩართული ამ კონფლიქტის მოგვარებაში, ერთად მივაწვდინოთ ხმა, მათთან ერთად ვიმოქმედოთ, რომ მსგავსი შემთხვევები თავიდან ავიცილოთ“, - განაცხადა პრემიერ-მინისტრმა.

ვიდეო, რომელზეც, სავარაუდოდ, ასახულია ცხინვალის წინასწარი დაკავების საკანში სამართალდამცავთა მიერ პატიმრების ცემა, სოციალურ ქსელში გავრცელდა.