საქართველოში გაერო-ს ლტოლვილთა უმაღლესი კომისრის ოფისის (UNHCR) ახლად დანიშნულმა წარმომადგენელმა ქემლინ ფერლიმ, საქართველოს საგარეო საქმეთა მინისტრს, დავით ზალკალიანს რწმუნებათა წერილი გადასცა.
როგორც „ინტერპრესნიუსს“ საგარეო საქმეთა სამინისტროდან აცნობეს, რწმუნებათა წერილის გადაცემის ცერემონიის შემდეგ გამართული შეხვედრის ფარგლებში, მხარეებმა ისაუბრეს არსებული თანამშრომლობისა და საქართველოში UNHCR-ის საქმიანობის შესახებ.
ქემლინ ფერლის მიეწოდა ინფორმაცია საქართველოს ოკუპირებულ რეგიონებში არსებული მდგომარეობის, ადგილზე ადამიანის უფლებების დარღვევის კუთხით არსებული მძიმე ვითარებისა და ბოლო პერიოდში მიმდინარე განვითარებების შესახებ. ამასთან, ხაზი გაესვა ჟენევის საერთაშორისო მოლაპარაკებების პროცესში UNHCR-ს ჩართულობის მნიშვნელობას.
უწყების ცნობითვე, შეხვედრის დასასრულს მხარეებმა მჭიდრო თანამშრომლობის გაგრძელებისათვის მზადყოფნა დაადასტურეს.