უზენაესი სასამართლოს მოსამართლეობის კანდიდატმა პაატა სილაგაძემ იურიდიულ საკითხთა კომიტეტის სხდომაზე გამოხატვის თავისუფლებასთან დაკავშირებით დასმულ კითხვას ვერ უპასუხა. კოალიციის „დამოუკიდებელი და გამჭვირვალე მართლმსაჯულებისთვის“ წარმომადგენელმა გიორგი მშვენიერაძემ სილაგაძეს ჰკითხა, კონსტიტუცია რა შემთხვევაში იძლევა შესაძლებლობას, რომ გამოხატვის თავისუფლება შეიზღუდოს და როგორია ტესტი, რომელსაც სასამართლო ატარებს შეზღუდვის შემოწმების დროს.

„გამოხატვის თავისუფლება უნდა იქნეს დაცული, ოღონდ მთავარია, რომ ვიღაცის უფლება ამით არ შეილახოს. სხვის უფლებებს არ უნდა შევეხოთ. ტესტის ორი ვარიანტი არსებობს - მკაცრი და მარტივი. მკაცრი შემოწმების ტესტმა ოთხი საფეხური უნდა გაიაროს. მეორე არის შედარებით მარტივი“, - განაცხადა სილაგაძემ, რაზეც გიორგი მშვენიერაძემ მიუთითა, რომ ეს მიდგომა თანასწორობის უფლებაზე გამოიყენება და არა გამოხატვის თავისუფლებაზე.

აღნიშნულის შემდეგ, პაატა სილაგაძემ განაცხადა, რომ ის გადაიღალა.