სანამ რამე ინციდენტი მომხდარა ვლადიმერ ხომერიკთან მიმართებით, მოვუწოდებ საქართველოს მთავრობას, შსს-ს და პრემიერ მინისტრს, რომ მიიღოს ყველა საჭირო ზომა, რადგან ჩვენი ქვეყნის სუვერენიტეტისთვის ამ დოზით არასასურველი პირის გაძევება მოხდეს საქართველოს ტერიტორიიდან, - ამის შესახებ „ევროპული საქართველოს“ წევრმა, გიორგი კანდელაკმა განაცხადა.

მისი თქმით, „საზოგადოებისთვის ცნობილია, რომ საქართველოს სუვერენიტეტის და ტერიტორიული მთლიანობის წინააღმდეგ პოლიტიკურ კამპანიას ამჯერად ახალციხეში ეწევა რუსეთის მოქალაქე, რუსეთის მთავრობის ღია დამცველი ბიზნესმენი ვლადიმერ ხომერიკი , რომელიც თავს ასევე უწოდებს რუსეთის პრეზიდენტის წარმომადგენელს“

„იგი ასევე ჩაბმული იყო მოლდოვის საპრეზიდენტო არჩევნებში და იქ ეხმარებოდა რუსეთის პრეზიდენტის სახელით პრორუს კანდიდატს. ბატონი ხომერიკი არის მხოლოდ რუსეთის მოქალაქე, მას არ გააჩნია საქართველოს მოქალაქეობა. იგი არაერთხელ გამოვიდა საქართველოს სუვერენიტეტის და ტერიტორიული მთლიანობის წინააღმდეგ. იგი ამართლებს რუსეთის სამხედრო შემოჭრას და სამხედრო აგრესიას. არ აღიარებს საქართველოს ტერიტორიულ მთლიანობას. ამჟამად იგი აწარმოებს პოლიტიკურ კამპანიას საქართველოს ტერიტორიაზე საქართველოს სუვერენიტეტის წინააღმდეგ. ჩვენ როგორც ვაფრთხილებდით გავრილოვის შემოშვებაზე საქართველოს მთავრობას, ზუსტად ასე გვინდა გავაფრთხილოთ საქართველოს მთავრობა. პირველ რიგში, რადგან ბატონი ხომერიკი მხოლოდ რუსეთის მოქალაქეა საქართველოს მთავრობას ჰქონდა ვალდებულება, რომ იგი არ შემოეშვა საქართველოს ტერიტორიაზე, რადგან იგი არის არასასურველი პიროვნება საქართველოს სუვერენიტეტისთვის, ჩვენი დამოუკიდებლობისთვის და ჩვენი პოლიტიკური სტაბილურობისთვის", - განაცხადა გიორგი კანდელაკმა.