ამსტერდამში, იტალიურ რესტორანთან სროლის შედეგად, ერთი ადამიანი დაიღუპა და ერთი დაიჭრა. ამის შესახებ ადგილობრივი მედია იუწყება.

სროლა ადგილობრივი დროით 16:00 საათზე, ხალხმრავალ მოედანზე მოხდა. პოლიცია შემთხვევის ადგილზე მალევე მივიდა და რამდენიმე ასეულ მეტრში ავტომობილს გზა გადაუჭრა, რომელიც, სავარაუდოდ, თავდამსხმელს ეკუთვნოდა.

დამნაშავე რამდენიმე გამაფრთხილებელი გასროლის შემდეგ დააკავეს.

სროლის მიზეზები და გარემოებები ამ დროისთვის უცნობია. პოლიცია თვითმხილველებს კითხავს.

მედიის ცნობით, მსხვერპლი და დაჭრილი რესტორნის დირექტორი და თანამშრომელია.