„თიბისი ბანკის“ გენერალური დირექტორის ვახტანგ ბუცხრიკიძის განცხადებით, დღეს „პროგრეს ბანკთან“ დაკავშირებით მედიაში გავრცელებული დოკუმენტი შედგენილია საერთაშორისო აუდიტორული კომპანია „დელოიტის“ მიერ, რომელიც „არის ტექნიკური დოკუმენტი და არანაირად არ უკავშირდება ფულის გათეთრების საერთაშორისო აუდიტორულ დასკვნას“.

„ეს დოკუმენტი არის წარმომადგენლობის უფლებამოსილების დამოწმების ხელშეკრულება, შესაბამისად, ეს დოკუმენტი, როცა ვნახეთ დღეს, დღესვე გადავუგზავნეთ ეროვნულ ბანკს",- განუცხადა ჟურნალისტებს ბუცხრიკიძემ.

მან „თიბისი ბანკის“ მიერ „პროგრეს ბანკის“ აქტივების შეძენასთან დაკავშირებითაც ისაუბრა.

„ჩვენ შევიძინეთ „პროგრეს ბანკის აქტივები და ვალდებულებები. ამასთან დაკავშირებით გავაკეთეთ ფინანსური და იურიდიული შემოწმება და ამის საფუძველზე შევიძინეთ აქტივები და ვალდებულებები”,- აცხადებს ბუცხრიკიძე.

კითხვაზე, „პროგრეს ბანკის“ 95%-იანი წილის შეძენის შემდეგ იყო თუ არა „თიბისი ბანკში“ დასკვნა, რომ დარჩენილი პროცენტი იძლეოდა რისკის საფუძველს, რომ შესაძლოა ფულის გათეთრება ყოფილიყო, ბუცხრიკიძე პასუხობს, რომ „ასეთი შესწავლა არ გაუკეთებიათ“.

„ეს ჩვენი ინტერესის სფერო არ იყო. მხოლოდ ის ნაწილი იყო შემოწმებული, რომლის აქტივებისა და ვალდებულებების შეძენას ვაწარმოებდით. ეს არ არის ერთი შემთხვევა, ბოლო ხუთი წლის განმავლობაში დაახლოებით ოთხი ასეთი ან უფრო დიდი ტრანზაქცია გვაქვს გაკეთებული და ყოველთვის, როცა ვაკეთებთ, შესაბამის ფინანსურ და იურიდიულ აუდიტს ვაწარმოებდით",- აცხადებს ვახტანგ ბუცხრიკიძე.