ერაყში ანტისამთავრობო პროტესტი განახლდა. ასობით ადამიანი ბაღდადში, თავისუფლების მოედანზე შეიკრიბა, სადაც ქვეყნის პოლიტიკური კლასის „ამოძირკვას“ ითხოვს. დემონსტრაციის დროს ათობით ადამიანი, მწვანე ზონისკენ გაემართა, სადაც სამთავრობო შენობები და საელჩოებია განთავსებული, თუმცა უსაფრთხოების ძალებმა ისინი წყლის ჭავლით მოიგერია.
დემონსტრაციები გაიმართა ერაყის სამხრეთ ქალაქებში, დივაინაჰსა და ნასირიაშიც, სადაც დემონსტრანტები აცხადებენ, რომ არ დაიშლებიან, ვიდრე „რეჟიმი არ დაემხობა“.
„ფრანს 24“-ის ცნობით, ქვეყანაში უფრო მასშტაბური აქციებია მოსალოდნელი.
შეგახსენებთ, ერაყში მასობრივი დემონსტრაციები პირველი ოქტომბრიდან მიმდინარეობდა. სამართალდამცავებთან შეტაკებების დროს 157 ადამიანი დაიღუპა. მათ შორის უმეტესობას ტყვია თავისა და გულშის არეში ჰქონდა მოხვედრილი.