საბჭო არ არის პოლიტიკური ორგანო და ის რეფორმები, რომელიც გავიარეთ, პირდაპირ გამორიცხავს პოლიტიკას იუსტიციის უმაღლესი საბჭოდან, ამიტომ გაურკვეველია პოლიტიკასთან საბჭოს დაკავშირება,- ამ განცხადებით იუსტიციის უმაღლესი საბჭოს მდივანი გიორგი მიქაუტაძე იუსტიციის უმაღლესი საბჭოს არამოსამართლე წევრის ანა დოლიძის ბრალდებას ეხმიანება მის პოლიტიკურ დევნასთან დაკავშირებით.

მისივე თქმით, ბუნდოვანი და გაურკვეველია ვინ უკრძალავს ანა დოლიძეს შეფასებების გაკეთებას სასამართლო სისტემასთან დაკავშირებით. მიქაუტაძე აცხადებს, რომ აღნიშნულთან დაკავშირებით ანა დოლიძის განცხადება კიდევ ერთი ტყუილია.

მისივე თქმით, სასამართლო სისტემის მიმართ კრიტიკული პოზიციით გამოირჩევა ასევე ნაზი ჯანეზაშვილიც, თუმცა მისი განცხადებები პოლიტიკურ საქმიანობად არავის შეუფასებია.

„ანა დოლიძე არის ერთადერთი საბჭოს წევრი, რომელიც ქვეყანაში მიმდინარე ყველა აქტუალურ პოლიტიკურ საკითხზე საჯაროდ გამოდის. აქვს საჯაროდ გაცხადებული საარჩევნო და პოლიტიკური მიზნები. ჩვენ გვყავს სხვა კრიტიკულად განწყობილი წევრებიც, თუმცა, არც ერთხელ ქალბატონი ნაზის მიმართ არ ყოფილა პრეტენზია, რომ მისი საქმიანობა და შეფასებები გასცდა როდესმე სასამართლო სისტემას. არასდროს გვითქვამს, რომ ის აქტიურად არის ჩართული პოლიტიკაში. ჩვენ ვხელმძღვანელობთ მხოლოდ და მხოლოდ ფაქტებით, რომელიც წარმოადგინა სხდომაზე დიმიტრი გვრიტიშვილმა და ეს უნდა გახდეს მსჯელობის და ფართო საზოგადოების ყურადღების საგანი",- განაცხადა გიორგი მიქაუტაძემ.