მან განაცხადა, რომ შეცდომა დაუშვა და შეიძლება არასწორი მიმართულებით ისროლა. ის, რომ შტურმის საშიშროება არ იყო და არ იყო ძალა გამოსაყენებელი, ეს არ უთქვამს, - ამის შესახებ შს მინისტრმა ვახტანგ გომელაურმა განაცხადა, რითაც 20 ივნისის საქმეზე ბრალდებული სპეცრაზმელის აღიარებით ჩვენებას გამოეხმაურა, სადაც გიორგი ესიაშვილი აცხადებს, რომ სროლის აუცილებლობა არ იყო. გომელაური მიიჩნევს, რომ სპეცრაზმელმა ისაუბრა კონკრეტულ ეპიზოდზე და არა მთლიანად ოპერაციაზე, რომელიც პარლამენტთან აქციის დაშლის მიზნით ჩატარდა.

„მან განაცხადა, რომ შეცდომა დაუშვა და შეიძლება არასწორი მიმართულებით ისროლა. ის, რომ შტურმის საშიშროება არ იყო და არ იყო ძალა გამოსაყენებელი, ეს არ უთქვამს. ალბათ მან თქვა, რომ სროლის აუცილებლობა არ იყო იმ კონკრეტულ შემთხვევაში, სადაც მან გაისროლა და დააზიანა რომელიმე მოქალაქე. ამ ადამიანს მთლიანი ოპერაცია არ შეუფასებია და ვერც შეაფასებდა, რადგან არც აქვს უფლება, რიგითმა სპეცრაზმელმა შეაფასოს იყო თუ არა რამე საჭიროება“, - განაცხადა ვახტანგ გომელაურმა.

კითხვაზე იყო თუ არა პარლამენტთან მიმდინარე აქციის დაშლის ოპერაციის ჩატარების აუცილებლობა, შს მინისტრმა განაცხადა: „რა თქმა უნდა საჭირო იყო“.