ზესტაფონში ქალაქის ტრადიციული სახალხო დღესასწაული „ზესტაფონობა 2019" და ღვინის ფესტივალი აღნიშნეს. ორდღიანი სახალხო ზეიმი ლირიული სიმღერის ფესტივალს „სულიკო 2019" - სა და ზესტაფონობას აერთიანებდა. ამის შესახებ „ინტერპრესნიუსს“ ზესტაფონის მუნიციპალიტეტის მერიიდან აცნობეს.

სახალხო ზეიმს, ადგილობრივ თვითმმართველობასთან ერთად, იმერეთში სახელმწიფო რწმუნებული ზვიად შალამბერიძე, მოადგილე იოსებ ხახალეიშვილი, ზესტაფონის დამეგობრებული ქალაქების - კირიათ ბიალიკის, ტჩევის და ტაურაგეს პირველი პირები, ასევე სხვა ოფიციალური პირებიც ესწრებოდნენ.

„ზესტაფონობა 2019"-ის ერთ-ერთი მთავარი ატრიბუტი, გიგანტური ზომის ხაჭაპური იყო, რომელიც საგანგებოდ ამ დღისთვის გამოაცხვეს. ღონისძიებების ფარგლებში დააჯილდოვეს " ზესტაფონის საპატიო მოქალაქეები". ასევე გამოვლინდნენ საუკეთესო ღვინის მწარმოებლები, რომლებსაც ფულადი პრიზები გადაეცათ.

სახალხო ზეიმს ზესტაფონში მსოფლიო საოპერო სცენის ვარსკვლავი ნინო სურგულაძეც ესწრებოდა. მან ზესტაფონელებს, ქალაქის დღესასწაული მიულოცა და 9 ნოემბერს, ქუთაისში დაგეგმილ საქველმოქმედო კონცერტზე დაპატიჟა. სხვადასხვა კულტურული, სპორტული თუ მხატვრული ღონისძიებები გალა კონცერტით დასრულდა,”-აღნიშნულია ზესტაფონის მუნიციპალიტეტის მერიის ინფორმაციაში.