ყველაფერი უნდა გავაკეთოთ იმისათვის, რომ პირის დაზარალებულად ცნობასთან დაკავშირებით კანონმდებლობა შეიცვალოს ისეთნაირად, რომ ასეთ უხერხულობაში აღარ მოგვიწიოს ყოფნა, - ამის შესახებ დარგობრივი ეკონომიკისა და ეკონომიკური პოლიტიკის კომიტეტის თავმჯდომარე რომან კაკულიამ ჟურნალისტებს განუცხადა. ამით კაკულიამ უპასუხა ჟურნალისტების შეკითხვას, რატომ არ აქვთ 20 ივნისს დაშავებულ პირებს დაზარალებულის სტატუსი მინიჭებული. კაკულიას თქმით, მიდგომა, რომლის მიხედვითაც პირის დაზარალებულად ცნობა ხდება, შესაცვლელია, რადგან მან აბსურდული სიტუაცია შექმნა.

„ვფიქრობ, ეს არის კანონმდებლობის და მიდგომის ძალიან დიდი ხარვეზი, რომელიც ასეთ უხერხულობაში მაყენებს მეც და ალბათ, ყველას, ვისაც უნდა, რომ რეალურად იყოს ასახული მომხდარი სიტუაცია იმ შედეგებში, რომელიც დადგება. იმაზე მსჯელობა, რომ მაკო გომური არ დაზარალებულა, მემგონი საერთოდ არავითარ ლოგიკაში არ ჯდება, მაგრამ მესმის ის კანონმდებლობასთან დაკავშირებული განმარტებები, რომელიც პროკურატურაში კეთდება. ყველაფერი უნდა გავაკეთოთ იმისათვის, რომ ეს კანონმდებლობა შეიცვალოს ისეთნაირად, რომ ასეთ უხერხულობაში აღარ მოგვიწიოს ყოფნა. არანაირ ლოგიკას არ ექვემდებარება, მაკო გომურს არ ვუწოდო დაზარალებული. მე არ ვფიქრობ, რომ პოლიტიკურ დაკვეთასთან გვაქვს საქმე. არამგონია, არსებობდეს მოსამართლე, რომელსაც კანონმდებლობა აძლევდეს საშუალებას და მან უკან დაიხიოს და მას არ უწოდოს დაზარალებული, მაგრამ ეს ხარვეზი გამოსასწორებელია. ეს მიდგომა უნდა შეიცვალოს, რომლის მიხედვითაც დღევანდელი კანონმდებლობით ადამიანი სახელდება დაზარალებულად. ამ მიდგომამ მიგვიყვანა ასეთ აბსურდულ სიტუაციამდე, რაც ძალიან სამწუხაროა,“ - განაცხადა რომან კაკულიამ.

შეგახსენებთ, 20 ივნისის საქმეზე სასამართლომ 16 პირიდან არც ერთი, მათ შორის არც მაკო გომური დაზარალებულად არ სცნო.