ბიძინა ივანიშვილს ჰიმნები უძღვნეს და ლამის წმინდანად გამოაცხადეს,- ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ ჟურნალისტებთან განაცხადა. როგორც მან აღნიშნა, ბიძინა ივანიშვილის ქველმოქმედება ყოველთვის პოლიტიკურ კამპანიასთან იყო დაკავშირებული.
მისივე თქმით, ბიძინა ივანიშვილმა საპრეზიდენტო არჩევნების პირველი ტურის შემდეგ იგრძნო „ამომრჩევლის სუსხი" და „ამომრჩეველს გაფითრებულმა სთხოვა, რომ კიდევ აცადოს მას და პრობლემებს მოაგვარებს, თუმცა, ახლა 2020 წლის არჩევნების წინაც აგრძელებს საზოგადოების მოტყუებას“.
„ეს არის უტიფრობის გაგრძელება. სასაცილოა, რომ არ იყოს დაკავშირებული ეს ყველაფერი იმასთან, თუ საით მიჰყავს მას ქვეყანა და თითოეული მოქალაქის ცხოვრება. აღარ უნდა მოტყუვდეს ქართული საზოგადოება ამ ადამიანის და მისი გარემოცვის უტიფარი დაპირებებით. ცდილობს კიდევ მოგვატყუოს, საუბრობს იმაზე, რომ ქველმოქმედია და უძღვნეს ჰიმნები და ლამის წმინდანად გამოაცხადეს. ეს კაცი ყოველთვის პოლიტიკური ქულების ჩასაწერად იყენებდა იმას, რასაც აკეთებდა, იმიტომ, რომ ქველმოქმედება არის მაშინ, როცა არ ელოდები უკუგებას“, - განაცხადა გიგა ბოკერიამ.