„ევროპული საქართველოს" ერთ- ერთი ლიდერი გიგა ბოკერია მიიჩნევს, რომ დეკანოზ გიორგი მამალაძის შეწყალების საკითხზე გადაწყვეტილების მიღებისას პრეზიდენტისთვის მნიშვნელოვანი ფაქტორი არა საზოგადოების მნიშვნელოვანი ნაწილისთვის ავტორიტეტული ინსტიტუტის მიმართვა, არამედ ობიექტური კრიტერიუმები უნდა იყოს. ამის შესახებ ბოკერიამ პარლამენტში ჟურნალისტებთან საუბრისას განაცხადა.

როგორც ბოკერიამ აღნიშნა, პრეზიდენტმა საზოგადოებას პასუხი უნდა გასცეს იმ შეწყალებებზე, რომელმაც საზოგადოების საფუძვლიანი აღშფოთება გამოწვია.

„მას აქვს მორალური და პოლიტიკური ვალდებულება თითოეული გადაწყვეტილებისას საზოგადოებას აუხსნას რა კრიტერიუმებით მიიღო ესა თუ ის გადაწყვეტილება. ყველა გადაწყვეტილება დაყრდნობილი უნდა იყოს რაღაც კრიტერიუმებზე და წინა პრეზიდენტებს ჰქონდათ ინსტიტუტი შექმნილი - შეწყლების კომისია. შეიძლება არ მოგვწონდა გადაწყვეტილება, მაგრამ რაღაც წესით ხდებოდა შეწყალება. ამ ადამიანმა ეს ყველაფერი გააუქმა და უტიფრად უთხრა საზოგადოებას, რომ არც კი გიპასუხებთ კითხვებზე. მომავალში რა უნდა ქნას მან, მე არ ვუკარნახებ, მაგრამ ყველა გადაწყვეტილება უნდა ეყრდნობოდეს რაღაც კრიტერიუმებს. ფაქტორი ( დეკანოზ მამალაძის შეწყალების საკითხთან დაკავშირებით) უნდა იყოს ობიექტური კრიტერიუმები და არა რომელიმე თუნდაც საზოგადოების მნიშვნელოვანი ნაწილისთვის ავტორიტეტული ინსტიტუტის მიმართვა. ეს არ შეიძლება იყოს ფაქტორი,"- განაცხადა გიგა ბოკერიამ.