დავით ზალკალიანი - ვიდრე ქართველ ხალხს სჯერა ევროპის,  ჩვენ  განვაგრძობთ ევროპის კარზე კაკუნს

ევროკავშირში გაწევრიანება საქართველოს საგარეო პოლიტიკის მიზნად დარჩება მანამდე, სანამ ქართველ ხალხს სჯერა ევროპის. ჩვენ კვლავაც განვაგრძობთ ევროპის კარზე კაკუნს, - ამის შესახებ საქართველოს საგარეო საქმეთა მინისტრმა დავით ზალკალიანმა აღმოსავლეთ პარტნიორობის 10 წელთან დაკავშირებით შვედეთის მიერ ორგანიზებულ ღონისძიებაზე გამოსვლისას განაცხადა.

მინისტრის თქმით, აღმოსავლეთ პარტნიორობა ევროპასთან თანმიმდევრული ეკონომიკური ინტეგრაციისა და პოლიტიკური ასოცირების პროექტია, რომელიც საქართველოს ევროპეიზაციის პროცესს შეუქცევადს ხდის. ამ კონტექსტში, მინისტრმა აღმოსავლეთ პარტნიორობის ფარგლებში საქართველოს მიერ გადადგმულ ნაბიჯებსა და წარმატებებზე ისაუბრა. მისი თქმით, საქართველომ ხელი მოაწერა საქართველოს პოლიტიკური დღის წესრიგის განმსაზღვრელ დოკუმენტს - ასოცირების შეთანხმებას, ღრმა და ყოვლისმომცველი თავისუფალი ვაჭრობის სივრცის ჩათვლით, ამასთან, ამოქმედდა ვიზალიბერალიზაცია, რომელიც უმნიშვნელოვანესი პოლიტიკური წარმატება და ხელშესახები შედეგია თითოეული მოქალაქისთვის.

„დღევანდელი საქართველო მკვეთრად განსხვავდება 10 წლის წინანდელი საქართველოსგან. ევროპული ქვეყნებისთვის საქართველო დღეს არა მხოლოდ მეზობელი, არამედ სტრატეგიულო პარტნიორიცაა“, - განაცხადა ზალკალიანმა.

საგარეო უწყების ხელმძღვანელის განცხადებით, საქართველოს აქვს ამბიციური მიზანი, გადადგას უფრო მეტი ნაბიჯი ასოცირების შეთანხმებით ნაკისრი ვალდებულებების შესრულების მიმართულებით და სწორედ ამას ითვალისწინებს მთავრობის მიერ შემუშავებული კონცეპტუალური დოკუმენტი „ევროკავშირში ინტეგრაციის საგზაო რუკა“. კიდევ ერთ ამბიციურ მიზანს წარმოადგენს ევროკავშირის ერთიან ბაზარზე წვდომა, რაც საქართველოს ევროკავშირის შიდა ბაზრის ოთხი თავისუფლებით სარგებლობის შესაძლებლობას მისცემს.

როგორც ზალკალიანმა აღნიშნა, რეფორმების პროგრამის განხორციელება საქართველოსგან დაუღალავ ძალისხმევას მოითხოვს.

„მომავალში ჩვენ უფრო ფლექსიურები, დინამიურები და მომავალზე ორიენტირებულები უნდა გავხდეთ. ამასთან, ევროკავშირის კანონმდებლობის ყველა შესაბამისი ელემენტის პრაქტიკაში განსახორციელებლად ჩვენ არა მარტო სურვილი, არამედ ქმედითი შესაძლებლობები გვჭირდება“, - განაცხადა საგარეო საქმეთა მინისტრმა.

შვედეთის სამეფოში ვიზიტის ფარგლებში საქართველოს საგარეო საქმეთა მინისტრმა მონაწილეობა მიიღო აღმოსავლეთ პარტნიორობის 10 წელთან დაკავშირებით შვედეთის მიერ ორგანიზებულ ღონისძიებაში, სადაც დამსწრე საზოგადოებას სიტყვით მიმართეს საქართველოს საგარეო საქმეთა მინისტრმა დავით ზალკალიანმა და შვედეთის საგარეო საქმეთა მინისტრმა ენ ლინდემ.​

ინფორმაციას საგარე საქმეთა სამინსიტროს პრესსამსახური ავრცელებს.

ამირან სალუქვაძე - რაც ახლა ხდება, ეს არა პოლიტიკური კრიზისი, არამედ პოლიტიკურ ოპონენტთა შორის თანაცხოვრების კრიზისია
ქართული პრესის მიმოხილვა 22.11.2019
მიხეილ კალანდია - თამამად შემიძლია ვთქვა, რომ 19 წლის ასაკში პოლიტიკური პატიმარი ვარ
თეგეტა მოტორსის სპეციალური შეთავაზება ზამთრის საბურავებზე
სადაზღვევო კომპანია პრაიმში მასშტაბურმა აქცია დაიწყო!
სპეციალური პირობები სამშენებლო კომპანიებისთვის SAP Business One-ის დანერგვაზე BDO-სგან
26 ახალი და გემრიელი შესაძლებლობა - საბვეიში განახლებული მენიუა (R)