ამერიკელი კონგრესმენი - „დემოკრატები“ და „რესპუბლიკელები“ რაღაცებზე ვერ ვთანხმდებით ხოლმე, მაგრამ როდესაც საქმე საქართველოს ეხება, ჩვენ ერთიანები ვართ

„დემოკრატები” და „რესპუბლიკელები“ რაღაცებზე ვერ ვთანხმდებით ხოლმე, მაგრამ როდესაც საქმე საქართველოს ეხება, ჩვენ ერთიანები ვართ, - ამის შესახებ ამერიკელმა კონგრესმენმა, ადამ კინზინგერმა ბათუმში, საქართველოს თავდაცვისა და უსაფრთხოების კონფერენციის დაწყებამდე განაცხადა.

მისი თქმით, დღეს შეხვდა საქართველოს თავდაცვის მინისტრს, სადაც კიდევ ერთხელ გაუსვეს ხაზი ამერიკის შეერთებული შტატების მხარდაჭერას საქართველოსადმი და ქართველი ხალხისადმი.

„ჩვენ გვესმის ამ ურთიერთობის მნიშვნელობა. როდესაც ვსაუბრობთ გარკვეული მოსალოდნელი გამოწვევების არსებობაზე, ცხადია, ყოველდღიურად ვხედავთ გამოწვევებს რუსეთიდან და რუსეთის მიერ საქართველოს ოკუპაციიდან, ასევე, ვხედავთ გამოწვევებს დეზინფორმაციის მხრივ. რა თქმა უნდა, აშშ-ში ჩვენ საქმე გვქონია ბევრ გამოწვევასთან, იყო ეს კიბერშეტევები თუ ჩვენი ინსტიტუტებისთვის ძირის გამოთხრა. ჩვენ ვადასტურებთ იმ ძლიერ მეგობრობას, რაც გვაქვს, ამერიკელი ხალხის სახელით მე მინდა ვთქვა, რომ ჩვენ ხელახლა ვადასტურებთ ძლიერ მხარდაჭერას ამ ქვეყნისა და ამ პარტნიორობის მიმართ", - განაცხადა კინზინგერმა.

მანვე უპასუხა კითხვას აშშ-ს კონგრესის წარმომადგენელთა პალატის მიერ საქართველოს მხარდამჭერი რეზოლუციის დამტკიცების შესახებ.

„ის ყურადღებას ამახვილებს რუსეთის მიერ საქართველოს ოკუპაციის აღიარებაზე, საქართველოს ხალხის უფლებაზე, თავადვე განსაზღვრონ, თუ ვინაა მათი მთავრობა. ამას მოაქვს იმ ადამიანების სანქცირების შესაძლებლობა, ვინც საქართველოს ოკუპაციაში არიან ჩართულები. ყველაზე მნიშვნელოვანი არის ის, რომ აქტი ძალიან ორპარტიულია - ჩვენ, დემოკრატები და რესპუბლიკელები რაღაცებზე ვერ ვთანხმდებით ხოლმე, მაგრამ როდესაც საქმე საქართველოს ეხება ბევრ სხვა საგარეო საკითხს, ჩვენ ერთიანები ვართ", - განაცხადა კინზინგერმა.

მაია ბითაძე - ევროპამ 50 წლით გაგვისწრო, მაგრამ ნაბიჯ-ნაბიჯ ჩვენც მივყვებით
ქართული პრესის მიმოხილვა 12.11.2019
ვახტანგ ძაბირაძე - ოპოზიციაში არ ჩანს ოპოზიციური ძალა, რომელიც ოპოზიციურად განწყობილი პოლიტიკური ძალებისა და ელექტორატის ლიდერი გახდებოდა
„სამ რაან სპა-ცენტრი“ ევროპის საუკეთესო სპად დასახელდა