სალომე ზურაბიშვილი საპატრიარქოში განვითარებულ მოვლენებს ქვეყნის დესტაბილიზაციის მცდელობად აფასებს.
ჟურნალისტების კითხვაზე, იზიარებს თუ არა საქართველოს პრეზიდენტი პარლამენტის თავმჯდომარის, არჩილ თალაკვაძის მოსაზრებას, რომ შესაძლოა,
საპატრიარქოში მოვლენების უკან იდგნენ ის ადამინები, რომლებიც პარლამენტზე მიტანილი შეტევის უკან იდგნენ, ზურაბიშვილი აცხადებს, რომ ის ამ მოვლენებს ასეთ შეფასებას ვერ მისცემს.
„არ ვიცი რა განაცხადა პარლამენტის თავმჯდომარემ. მე ასეთ შეფასებას ვერ მივცემ. მე ვამბობ და კონფერენციაზეც აღვნიშნე, რომ ეს იყო ქვეყნის დესტაბილიზაციის ერთ-ერთი მცდელობა, რასაც საზოგადოებამ ღირსეულად უპასუხა და ეს ძალიან მნიშვნელოვანია.
იმ მომენტში, როცა ეს ქვეყანა მიდის წინ, როცა მომავალ წელს ვამზადებთ არჩევნებს, ძალიან მნიშვნელოვანია, რომ ეს სტაბილურობა, რომელიც საქართველოსთვის ერთ-ერთი ყველაზე ძლიერი კოზირია, არავისგან არ იყოს შერყეული“, - აღნიშნა ზურაბიშვილმა.