14 ნოემბრიდან, თვეში ერთხელ, ჟურნალ „გზასთან" ერთად, „ქართული მონეტების ოქროს კოლექცია" გაიყიდება. ამის შესახებ „ინტერპრესნიუსს“ გამომცემლობა „პალიტრა L“-იდან აცნობეს.
„ქართული მონეტების ოქროს კოლექცია" საქართველოს ეროვნული მუზეუმისა და გამომცემლობა „პალიტრა L“-ის მიერ განხორციელებული პროექტია, რომელიც წიგნ-ალბომსა და მონეტების კოლექციას აერთიანებს.
„პალიტრა L“-ის მარკეტინგის ხელმძღვანელის, ანანო თავხელიძის განცხადებით, მონეტების კომპლექტი სპეციალურ ფასად იქნება ხელმისაწვდომი.
„ქართული მონეტების ოქროს კოლექცია" შედგება 24 მონეტისაგან, რომლითაც ივსება წიგნი-ალმობი. 14 ნოემბრიდან, თვეში ერთხელ, ჟურნალ „გზასთან" ერთად, მონეტების კომპლექტი სპეციალურ ფასად იქნება ხელმისაწვდომი. პროექტი 5 თვის განმავლობაში გაგრძელდება. მკითხველი 4 თვის გამნავლობაში, ჟურნალთან ერთად 5-5, ბოლო თვეს კი - 4 მონეტას მიიღებს. მნიშვნელოვანია, რომ პროექტის განმავლობაში (5 თვე) წიგნი-ალბომი, რომელსაც მკითხველი შეგროვებული 24 მონეტით შეავსებს, სპეციალურ ფასად - 20.90 ლარად იქნება ხელმისაწვდომი. ალბომს ასევე, მოჰყვება სპეციალური ლუპა. ვფიქრობ, რომ ისტორიული პროექტია, რადგან უკვე ყველა ჩვენგანს აქვს შესაძლებლობა, შეეხოს საქართველოს ისტორიას“, - განაცხადა ანანო თავხელიძემ.
„ალბომზე ნუმიზმატთა და ისტორიკოსთა გუნდი დიდი ხნის განმავლობაში მუშაობდა. წიგნ-ალბომში წარმოდგენილი მონეტების ორიგინალები დაცულია საქართველოს ეროვნულ მუზეუმში.
თითოეულ მონეტას ერთვის შესაბამისი ეპოქის მიმოხილვა. ალბომში შეხვდებით ეროვნულ მუზეუმში დაცულ ეპოქების ამსახველი ექსპონატების ფოტოებსაც, რომლებიც ისტორიული სიზუსტით აღწერენ თითოეულ მონეტას“, - აღნიშნულია ინფორმაციაში.
„მონეტებთან ერთად ავარჩიეთ საქართველოს ეროვნულ მუზეუმში დაცული ექსპონატებიც, რათა ეპოქა შეძლებისდაგვარად გაგვეცოცხლებინა. დაახლოებით ნეკის ფრჩხილისხელაა იმერეთის მეფე გიორგი მეორის მონეტა, მაგრამ მასზე დატანილი გამოსახულება ზუსტად იმეორებს გელათის ტაძრის ფრესკას, რომლის ფოტომასალაც თან ერთვის წიგნს. დავით ნარინის მონეტას ფოტომასალად დმანისის ნაქალაქარი შევურჩიეთ. მნიშვნელოვანია თამარ მეფის მონეტა, რომელზეც დედოფლის ხელრთვაა (ფაქსიმილეა) აღბეჭდილი და თამარის ვერცხლის სურა, რომელიც სვანეთის მუზეუმშია დაცული. ერეკლე მეფის მონეტას მეფის ხმლის ფოტო დავურთეთ. ასე რომ, ეს წიგნი ძალიან საინტერესოა. მისი გაცნობით, კოლექციონერობის სურვილთან ერთად, შესაძლოა მკითხველს სამეცნიერო ინტერესიც გაუჩნდეს. ვინ იცის, იქნებ ამ წიგნით დაინტერესებულმა ახალგაზრდებმა ხვალ ჩვენ შეგვცვალონ”, - განაცხადა ქართული მონეტების ოქროს კოლექციის თანაავტორმა მაია პატარიძემ.
„ქართული მონეტების ოქროს კოლექცია“ საქართველოს სახელმწიფოებრიობის მატიანეა, რომელიც უძველესი დროიდან XIX საუკუნის დასაწყისამდე პერიოდს მოიცავს. ამ მონეტებით მოყოლილი ისტორია არის საინტერესო გზა - საქართველოს სავაჭრო გზა და ის პერიოდები, როდესაც ფული იჭრებოდა. ყველა მონეტა ძალიან სკურპულოზურად არის შერჩეული იმ მეფეებთან დაკავშირებით, რომლთაც საქართველოს ისტორიაში მნიშვნელოვანი ადგილი უჭირავთ. ყველა ფული დევალვაციას განიცდის, თუმცა ეს არის ფული, რომელიც არასდროს უფასურდება. 24 განსხვავებული მონეტა - საქართველოს ისტორიას ქრონოლოგიურად გვიამბობს”, - აღნიშნულია ინფორმაციაში.