თვალსაჩინოდ ვნახეთ კანდიდატები, რომლებსაც არათუ უზენაეს სასამართლოში უვადოდ მოსამართლეობა, არამედ რამდენად აქვთ მუშაობის უფლება ზოგადად სასამართლო სისტემაში, ესეც კითხვის ნიშნის ქვეშ არის,- ამის შესახებ კოალიცია „გამჭვირვალე მართლმსაჯულებისთვის“ წარმომადგენელმა გიორგი მშვენიერაძემ ჟურნალისტებთან განაცხადა. მან იმედი გამოთქვა, რომ კანდიდატებთან დაკავშირებული გადაწყვეტილება, რომელსაც პარლამენტი მიიღებს, ისედაც ნდობადაკარგულ სასამართლო სისტემას კიდევ მეტად არ დააკარგინებს საზოგადოების ნდობას.

„შესაძლებელია გვქონდეს საერთო შეხედულებები პროცესზე და კანდიდატებზე. პროცესზე ყველას აქვს შეხედულება, რომ ღია პროცესია, რაც შეეხება კანდიდატებს, მალე მოგვეცემა შესაძლებლობა წინასწარი ხედვა და პროგნოზები გვქონდეს, რას აპირებს ხელისუფლება. ჩემი დაკვირვებით, კანდიდატების ძალიან მცირე ნაწილია, რომელიც საკუთარი კომპეტენციით შეესაბამება იმ კრიტერიუმებს, რაც მოეთხოვება უზენაესი სასამართლოს მოსამართლეს",- განაცხადა გიორგი მშვენიერაძემ.