ქართველ ერს აწუხებს ოკუპაცია, ჯანდაცვა, სიღარიბე, სასამართლო და ამ თემებზე „ქართული მარში" ჩირგვებშია დამალული,- ამის შესახებ იუსტიციის უმაღლესი საბჭოს არამოსამართლე წევრმა ანა დოლიძემ ჟურნალისტებთან განაცხადა. ამით ის გამოეხმაურა ფილმის „და ჩვენ ვიცეკვეთ" ჩვენების ჩაშლის დაანონსებას რადიკალი ჯგუფების მხრიდან.
მისივე თქმით, რეალურ პრობლემებთან დაკავშირებით „ქართული მარშის“ განცხადებებს და აქტიურობას ვერ ხედავს, სხვა ყველაფერი კი დოლიძის შეფასებით, პოლიტიკური თამაშია.
„ჩვენ ვერ ვხედავთ „ქართულ მარშს“ იქ, სადაც მართლა არის ბრძოლა საქართველოს გადარჩენისთვის. „ქართული მარში“ არ გვინახავს საოკუპაციო ხაზთან, მცოცავი ოკუპაციის დროს, სასამართლოს თავისუფლებისთვის ბრძოლაში, საერო ეპიდემიასთან - აზარტულ თამაშებზე დამოკიდებულებასთან ბრძოლაში.
სხვა ყველაფერი არის ხელოვნურად შექმნილი პოლიტიკური თამაში, რომელიც რამდენად აწუხებს ქართველ ერს, მე არ ვიცი. ქართველ ერს აწუხებს ოკუპაცია, ჯანდაცვა, სიმსივნეები, სიღარიბე, სასამართლო. სად არის რომელიმე ამ თემასთან დაკავშირებით „ქართული მარში“? ჩირგვებშია დამალული“, - განაცხადა ანა დოლიძემ.