პოლიციური ძალები რჩებიან ყველა კინოთეატრში და მიმდებარე ტერიტორიაზე, რათა საზოგადოებრივი წესრიგი და უსაფრთხოება დაიცვან,-ამის შესახებ საპატრულო პოლიციის დეპარტამენტის უფროსმა ვაჟა სირაძემ ჟურნალისტებს “თბილისი გალერიში” განუცხადა, სადაც კინოთეატრ “კავეაში” ფილმის “და ჩვენ ვიცეკვეთ” ჩვენება მიმდინარეობს.

ვაჟა სირაძის თქმით, ნებისმიერი სამართალდარღვევის აქტი აღკვეთილი იქნება და პოლიცია შესაბამის ზომებს მიიღებს.

“საქართველოს კინოთეატრებში სეანსი დადგენილ დროს დაიწყო და მიმდინარეობს. პოლიციური ძალები რჩებიან ყველა კინოთეატრში და მიმდებარე ტერიტორიაზე, რათა საზოგადოებრივი წესრიგი და უსაფრთხოება დაიცვან. გარდა აღნიშნულისა, ნებისმიერი სამართალდარღვევის აქტი აღკვეთილი იქნება და მივიღებთ შესაბამის ზომებს. კოსტავას გამზირზე, კინოთეატრ “ამირანთან” მოხდა გარკვეული ინციდენტები, რომლის დროსაც დაკავებულია 11 პირი. მოხდა გარკვეული ინციდენტი მოქალაქე ანა სუბელიანთან დაკავშირებით, რაზეც შს სამინისტრომ მყისიერი რეაგირება მოახდინა. დაწყებულია გამოძიება 126 -მუხლით, რაც ძალადობას გულისხმობს. ძალადობაში მონაწილე პირი დაუყოვნებლივ იქნა დაკავებული”,-განაცხადა სირაძემ.