თბილისის კინოთეატრებთან საპროტესტო აქციისას ადმინისტრაციული სამართალდარღვევისთვის დაკავებული 24 პირის სასამართლო პროცესი თბილისის საქალაქო სასამართლოში ამ წუთებში მიმდინარეობს. ადმინისტრაციული სამართალდარღვევისთვის დაკავებული პირებიდან, ამ მომენტისთვის 5 პირის სასამართლო პროცესი გადაიდო.

აღნიშნულის მიზეზი ადვოკატ ცირა ჯავახიშვილის შუამდგომლობა გახდა, რომლის მიხედვითაც, მან მტკიცებულებების გასაცნობად, ასევე მტკიცებულებების საქმეზე წარსადგენად დრო მოითხოვა. აღნიშნული შუამდგომლობა მოსამართლე ლეილა გოგიშვილმა დააკმაყოფილა. პროცესი 11 დეკემბერს, 12:00 საათზე გაიმართება.

ცნობისთვის, შინაგან საქმეთა სამინისტროს მიერ თბილისსა და ბათუმში ადმინისტრაციულ სამართალდარღვევათა კოდექსის 173-ე (სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობა) და 166-ე (ხულიგნობა) მუხლებით გათვალისწინებული სამართალდარღვევის ფაქტებზე სულ დაკავებულია 27 პირი, მათ შორის 24 - თბილისში, 3 - ბათუმში. სისხლის სამართლის დანაშაულისთვის დაკავებულია 1 პირი.