„ქართული ოცნების“ პოლიტიკური ტერორიზმი საქართველოს მიაქანებს შეუმდგარი სახელმწიფოსკენ, - ასე აფასებს საზოგადოებრივი მოძრაობა „ლელოს“ დამფუძნებელი მამუკა ხაზარაძე ამერიკელი დიპლომატის ჯორჯ კენტის განცხადებას.
„ჯორჯ კენტის განცხადება არის დასტური ძალიან მაღალი ტრიბუნიდან იმისა, რომ „ქართულ ოცნებას“ მიტაცებული აქვს მართლმსაჯულება, სახელმწიფო და მიაქანებს ქვეყანას შეუმდგარი სახელმწიფოსკენ, რომელიც ვერასდროს დაამარცხებს სიღარიბეს, უსამართლობას, ოკუპაციას და ვერასდროს გახდება განვითარებული, თანამედროვე და თავისუფალი სამყაროს ნაწილი. ეს პოლიტიკური ტერორიზმია! ჩვენ თანდათან გავხდებით არასასურველი პარტნიორი დასავლეთისთვის და ერთადერთ გზად დარჩება რუსეთი. "ლელო" სწორედ ამიტომ შეიქმნა! ჩვენ ყველაფერს გავაკეთებთ და ბოლომდე ვიბრძოლებთ, რომ ეს რეალობა შევცვალოთ“, - განაცხადა მამუკა ხაზარაძემ.
შეგახსენებთ, გავრცელებული ინფორმაციით, ამერიკელმა დიპლომატმა, ჯორჯ კენტმა სენატში დაკითხვის დროს განაცხადა, რომ საქართველოს ხელისუფლება პროკურატურას ოპონენტების დევნასა და პოლიტიკური რეპრესიებისთვის იყენებს.