კატალონიის დამოუკიდებლობის მხარდამჭერებმა საფრანგეთისა და ესპანეთის დამაკავშირებელი მთავარი მაგისტრალი გადაკეტეს. მოწოდება გზის გადაკეტვაზე მოძრაობამ „დემოკრატიული ცუნამი“ გააკეთა.
„დოიჩე ველეს“ ინფორმაციით, გადაკეტილია გზის ორივე მიმართულება. ჯგუფის წევრები აცხადებენ, რომ სურთ საერთაშორისო საზოგადოების ყურადღება მიიპყრონ.
„ვაცხადებთ გენერალურ მობილიზაციას საზღვართან, მანქანებით ან მანქანების გარეშე. ამ ქმედების მიზანია, რომ საერთაშორისო საზოგადოებას მოვუწოდოთ გააგებინონ ესპანეთს, რომ საკითხზე მოლაპარაკებების გამართვა აუცილებელია“,- ნათქვამია „დემოკრატიული ცუნამის“ მიერ გამოქვეყნებულ განცხადებაში.
კატალონიაში მასშტაბური საპროტესტო აქციები 14 ოქტომბერს, მას შემდეგ დაიწყო, რაც ესპანეთის უზენაესმა სასამართლომ კატალონიელ ლიდერებს სეპარატიზმის გაღვივებაში დასდო ბრალი და 13 წლამდე თავისუფლების აღკვეთა მიუსაჯა.