ბოლივიის ოპოზიციონერმა სენატორმა ჯენინ ანეზმა თავი ქვეყნის დროებით პრეზიდენტად გამოაცხადა, ამის შესახებ ინფორმაციას „ბიბისი“ ავრცელებს.

გამოცემის ცნობით, საკანონმდებლო ორგანოს სესიას ყოფილი პრეზიდენტის ევო მორალესის პარტიის წევრებმა ბოიკოტი გამოუცხადეს, რაც იმას ნიშნავს, რომ დროებითი პრეზიდენტის დანიშვნისთვის საჭირო კვორუმი არ არსებობდა, თუმცა ანეზმა განაცხადა, რომ კონსტიტუციის თანახმად, ქვეყნის დროებითი მმართველი ის უნდა გამხდარიყო.

მორალესმა სენატორის ეს ნაბიჯი დაგმო და მას „სახელმწიფო გადატრიალებაში მონაწილე მემარჯვენე სენატორი“ უწოდა.

შეგახსენებთ, ბოლივიის ყოფილი პრეზიდენტი ევო მორალესი ქვეყანაში მიმდინარე საპროტესტო აქციების გამო, რამდენიმე დღის წინ თანამდებობიდან გადადგა, ქვეყანა დატოვა და მექსიკაში პოლიტიკური თავშესაფარი მიიღო.