პარლამენტის თავმჯდომარის არჩილ თალაკვაძის განცხადებით, ჯერჯერობით არ არის საჯაროდ ცნობილი გადაწყვეტილება, დატოვებს თუ არა თამარ ჩუგოშვილი, თამარ ხულორდავა და დიმიტრი ცქიტიშვილი პარტია „ქართულ ოცნებას“ . როგორც თალაკვაძემ პარტია „ქართული ოცნება - დემოკრატიული საქართველოს“ ოფისში გამართულ ბრიფინგზე განაცხადა, ყველა მნიშვნელოვან რეფორმაში და პოზიტიურ ინიციატივებში პარტიას მათი მხარდაჭერის იმედი აქვს.

„ისინი გადაწყვეტილებებს თავად მიიღებენ და გაახმოვანებენ. ჯერჯერობით არ არის ეს გადაწყვეტილებები საჯაროდ ცნობილი“, - განაცხადა თალაკვაძემ.

ამასთან, პარლამენტის თავმჯდომარემ განმარტა, ვინ დაესწრება ხვალ, 11:00 საათზე უმრავლესობის სხდომას.

„უმრავლესობის სხდომაზე შევიკრიბებით ის წევრები, ვინც რჩება უმრავლესობის შიგნით. რაც შეეხება ჩვენს თანაგუნდელებს, რომლებმაც სამწუხაროდ, დატოვეს უმრავლესობა, ჩვენ გვქონდა მათთან ინდივიდუალური კონსულტაციები მომავალში ყველა მნიშვნელოვან რეფორმაში და პოზიტიურ ინიციატივებში გვაქვს მათი მხარდაჭერის იმედი და დარწმუნებული ვარ, ეს ასეც იქნება“, - განაცხადა თალაკვაძემ.