სამწუხაროა ის ფაქტი, რომ საქართველოს პარლამენტში მმართველმა პარტიამ ვერ შეძლო ამ მნიშვნელოვანი რეფორმის მხარდაჭერისთვის კონსოლიდაცია, - ამის შესახებ ევროპარლამენტარი ანდრიუს კუბილიუსი სოციალურ ქსელ „ფეისბუქში“ წერს.

ლიტველი პოლიტიკოსი მიიჩნევს, რომ საქართველოში ბოლო დროს განვითარებულმა მოვლენებმა - საქართველოს პარლამენტის მიერ იმ საკონსტიტუციო ცვლილების ჩაგდებამ, რომელიც შერეული საარჩევნო სისტემიდან პროპორციულ სისტემაზე გადასვლას ითვალისწინებს, სერიოზული შეშფოთება გამოიწვია.

„შერეული საარჩევნო სისტემიდან პროპორციულ სისტემაზე გადასვლა ქართველი ხალხის მოთხოვნა იყო და პარლამენტმა ვერ შეძლო, საკუთარი ამომრჩევლისთვის მოესმინა. ვიმედოვნებ, რომ ეს კენჭისყრა გადამწყვეტი არ იქნება, პარლამენტი ამ საკითხს მიუბრუნდება და კომპრომისის მიღწევას შეძლებს.

იმავდროულად, უმრავლესობასა და ოპოზიციას მოვუწოდებ, გამართონ მნიშვნელოვანი მსჯელობა იმის შესახებ, თუ რა გზით შეიძლება აღნიშნული რეგრესის გადალახვა ისე, რომ მომავალი საპარლამენტო არჩევნები საქართველოს მთავრობის დაპირებისამებრ, პროპორციული წესით ჩატარდეს, რაზეც პასუხისმგებლობა ყველა პოლიტიკურ მოთამაშეს ეკისრება“, - წერს ანდრიუს კუბილიუსი.