გიორგი გახარიამ უნდა დაურეკოს მაგალითად, გერმანიის კანცლერს, ევროკომისიის პრეზიდენტს, ამ დონეზე თუ არ წამოიჭრა საკითხი, ძალიან ძნელი იქნება ექიმ ვაჟა გაფრინდაშვილის გამოხსნა, - ამის შესახებ „ევროპული საქართველოს“ ერთ-ერთმა ლიდერმა, გიორგი კანდელაკმა ჟურნალისტებთან განაცხადა.
მისივე თქმით, ის, როგორც ევროპასთან ინტეგრაციის კომიტეტის თავმჯდომარის მოვალეობის შემსრულებელი, კომიტეტის სახელით დღევე მისწეს წერილებს უმაღლესი რანგის თანამდებობის პირებს.
„სწორედ მაღალ დონეზე საკითხის დაყენებამ გახადა შესაძლებელი უკრაინელი მეზღვაურების ტყვეობიდან გამოხსნა.
გიორგი გახარიამ ან უნდა დაურეკოს მაგალითად, გერმანიის კანცლერს, ევროკომისიის პრეზიდენტს, ან წერილი მაინც უნდა მისწეროს. ამ დონეზე თუ არ წამოიჭრა საკითხი, ძალიან ძნელი იქნება ბატონი გაფრინდაშვილის გამოხსნა.
რადგან თამარ ხულორდავა და მისი მოადგილეც კომიტეტის თავმჯდომარეობიდან გადადგნენ, მე ამჟამად ვასრულებ ევროპასთან ინტეგრაციის კომიტეტის თავმჯდომარის მოვალეობას და ამ ფორმალურ ამპლუას გამოვიყენებ იმისთვის, რომ ახლავე მივწერო კომიტეტის სახელით წერილები უმაღლესი რანგის თანამდებობის პირებს, ევროკავშირში პირველ რიგში, მაგალითად, ევროპარლამენტის საგარეო ურთიერთობათა კომიტეტის თავმჯდომარეს და მსგავსი რანგის ოფიციალურ პირებს, იმისათვის, რომ მათ დააყენონ ვაჟა გაფრინდაშვილის გათავისუფლების საკითხი. ამ წერილს გავაგზავნი დღესვე.
საოკუპაციო რეჟიმი არის ანტიჰუმანური რეჟიმი, იგი იხევს ხოლმე უკან, როცა ასეთი საკითხები დგება მწვავედ მაღალ დონეზე. თუ საქართველო ვერ შეძლებს მაღალ დონეზე ამ საკითხის აქტუალიზაციას, რა თქმა უნდა, შანსები მაღალი არ იქნება, ამ რეალობას თვალი უნდა გავუსწოროთ,“- განაცხადა გიორგი კანდელაკმა.
ახალგორის რაიონში დაკავებულ ქართველ ექიმს ვაჟა გაფრინდაშვილის, 15 ნოემბერს, ახალგორის ე.წ.სასამართლომ ორთვიანი წინასწარი პატიმრობა შეუფარდა. გავრცელებული ინფორმაციით, ვაჟა გაფრინდაშვილი ოკუპირებულ ტერიტორიაზე პაციენტის სანახავად მიდიოდა.