დღეს ამდენი მედია პრინციპულად იქცა „ნაცმოძრაობის“ პროპაგანდისტულ ქვეგანყოფილებად, - ამის შესახებ საპარლამენტო უმრავლესობის ლიდერმა გია ვოლსკიმ ბიუროს სხდომაზე განაცხადა.

როგორც მან აღნიშნა, საზოგადოებას მედია არასწორ ინფორმაციას აწვდის.

„თითქოსდა მათი არსებობა ოდესმე იქნებოდა შესაძლებელი პოლიტიკური პროფილით, რომ არა მედია თავისუფლება, რომელიც დღეს არსებობს. ამაზე გავამახვილე ყურადღება იმიტომ, რომ ძალიან დიდი ოდენობით არასწორი ინფორმაცია მიეწოდება ხალხს იმ იმედით, რომ უმეცრება გადააჭარბებს ცოდნას და გამოცდილებას, რომელიც საზოგადოებას გააჩნია“, - განაცხადა გია ვოლსკიმ.

მან ასევე აღნიშნა, რომ დღის განმავლობაში ვრცელდებოდა დეზინფორმაცია იმის შესახებ, თითქოს სპეცრაზმმა პარლამენტის შესასვლელები აქციის მონაწილეებისგან მათ გამო გაწმინდა.

„დეზინფორმაციაა, რაზეც კომენტარი ვერ მოვასწარით, რომ ჩვენ თურმე ვინც აქ ვსხედვართ, რომ ბიურო ჩავატაროთ, ხუშტურია და ამისთვის ტარდება სპეცოპერაცია. კონკრეტული გვარებიც იყო მოხსენიებული, თავმჯდომარის, მოადგილის“, - განაცხადა გია ვოლსკიმ.