საპარლამენტო უმრავლესობის წევრის, ირაკლი კობახიძის განცხადებით, ვაკანტურ საპარლამენტო თანამდებობებზე კონსულატაციები დაწყებულია.
როგორც მან ჟურნალისტებს განუცხადა, სასურველია, რომ მომდევნო პლენარულ კვირაში გადაწყვეტილება იქნას მიღებული.
„გაგრძელდება კონსულტაციები და ალბათ, უახლოეს დღეებში გვექნება გარკვეული მონახაზი. სასურველია, რომ უკვე მომდევნო პლენარულ კვირაში მივიღოთ გადაწყვეტილებები,“ - განაცხადა კობახიძემ.
კითხვაზე, დაიკავებს თუ არა ის საპარლამენტო თანამდებობას, კობახიძე ამას გამორიცხავს.
„მე არ დავიკავებ არცერთ საპარლამენტო თანამდებობას, მე დაკავებული ვიქნები პარტიული საქმიანობით და შესაბამისად, შემიშლიდა ხელს რაიმე საპარლამენტო თანამდებობა ამ პროცესში,“ - განაცხადა კობახიძემ.
შეგახსენებთ, რომ პროპორციულ საარჩევნო სისტემასთან დაკავშირებული კანონპროექტის ჩავარდნის შემდეგ, მმართველი გუნდის რამდენიმე წევრმა, მათ შორის პარლამენტის ვიცე-სპიკერმა თამარ ჩუგოშვილმა და რამდენიმე კომიტეტის თავმჯდომარემ, უმრავლესობა და საპარლამენტო თანამდებობები დატოვეს.